Ўзбекистоннинг Туркиядаги фавқулодда ва мухтор элчиси Илҳом Ҳайдаров Туркиянинг Каҳрамонмараш вилоятига амалий ташриф доирасида қатор музокаралар ўтказди. Учрашувларда тўқимачилик, қурилиш, қишлоқ хўжалиги ва озиқ-овқат маҳсулотлари йўналишларида ҳамкорлик истиқболлари муҳокама қилинди.
Жорий йилнинг сентябр ва октябр ойлари ўтказилиши режалаштирилган «TextileExpo Uzbekistan Autumn», «CAITME 2025», «Texworld Tashkent» ҳамда «Apparel Sourcing Tashkent» халқаро кўргазмалари доирасида Қаҳрамонмараш вилояти ишбилармон доира вакилларининг Ўзбекистонга бизнес-миссиясининг ташкил этишга келишилди.
Махсус учрашув Каҳрамонмарашдаги дунёга машҳур «Mado» компанияси раҳбари Мехмет Канбур билан бўлиб ўтди. Суҳбат чоғида компаниянинг Ўзбекистонда савдо нуқталарини кенгайтириш ва «премиум бренд» сифатида тўлиқ циклли қандолат маҳсулотлари заводини ташкил этиш имкониятлари муҳокама қилинди.
Ташриф доирасида «Temsan Makina» ва «Arikan Group» корхоналарининг ишлаб чиқариш қувватлари билан ҳам танишилди. Шу билан бирга, Ўзбекистондаги маҳаллий тўқимачилик корхоналари билан қўшма лойиҳаларни амалга ошириш масалалари ҳам кўриб чиқилди.
Муҳокамалар икки давлат ўртасидаги иқтисодий алоқаларни янада кучайтириш, ишлаб чиқариш салоҳиятини ошириш ва қўшма брендларни ривожлантиришга қаратилгани таъкидланди.