Украина президенти Володимир Зеленский «Украина халқининг миллий хотираси давлат сиёсати асослари тўғрисида»ги қонунни имзолади. Унга кўра, мамлакат тарихида илк бор «рашизм» термини расман қонуний асосда таърифланган. Бу ҳақдаги маълумот Украина Олий Радаси сайтида эълон қилинди.
Қонунга мувофиқ, «рашизм» — бу тоталитар идеологиянинг бир кўриниши бўлиб, у Россиядаги «нацизмга мойил тоталитар режим» сиёсий асосларига таянади. Ҳужжатда таъкидланишича, бу идеология Россия шовинизми ва империализми анъаналарига таянган ҳолда коммунистик ва нацизм тарзидаги амалиётларни қўллайди.
Мақсад — Россия томонидан Украина тарихини бузиб кўрсатиш, «умумий мерос» ҳақидаги тезислар орқали урушни оқлаш уринишларига қарши туриш. Янги қонун жамиятни умумий тарихий ҳақиқат атрофида бирлаштириш воситаси сифатида қабул қилинди.
Шунингдек, қонун доирасида «Украинанинг мустақиллик учун урушлари», «украин халқига қарши жиноятлар» ва «тарихий аксилукраин тарғибот» каби атамалар ҳам аниқ белгилаб қўйилди. Қонунга кўра, Украина Миллий хотира институтининг таклифига асосан, ҳар 5 йилда Вазирлар маҳкамаси Украина миллий хотирасини тиклаш ва асраш бўйича Давлат стратегияси ва уни амалга ошириш режасини тасдиқлаб бориши лозим.