Инвестициялар, саноат ва савдо вазирлиги «ASTANA MOTORS COMPANY» билан 396,6 млн сўмлик BYD Song Plus автомобилини тендерсиз тўғридан-тўғри шартнома асосида харид қилди. Шартнома Тошкентда шу йилнинг 28 август куни имзолангани кўрсатилган.
Президент Шавкат Мирзиёев бу йил 5 март куни бўлиб ўтган Коррупцияга қарши курашиш бўйича миллий кенгаш йиғилишида хизмат машиналари сонини қисқартириш ва миллий автомобилларда юриш талабини қатъий белгилаган эди.
Шунга қарамасдан, вазирлик томонидан танланган «ASTANA MOTORS COMPANY» хорижий компания бўлиб, у Сингапурда рўйхатдан ўтган A. G. OVERSEAS PTE. LTD га тегишли. 2022–2025 йилларда мазкур компания Ўзбекистон ҳукуматига энг кўп автомобил етказиб берган хорижий фирмалардан бири ҳисобланади.
Иқтисодий тадқиқотлар институти маълумотларига кўра, 2025 йил иккинчи чорагида мамлакатнинг давлат қарзи 43,3 млрд долларга етган. Шунинг 36,4 млрд доллари ташқи қарз, 6,9 млрд доллари эса ички қарзни ташкил қилади.
Хорижий автомобил хариди фондида бу қарор жамоатчиликда саволлар уйғотди. Чунки президентнинг талабига зид ҳолда амалга оширилган бу келишув давлат ресурсларидан оқилона фойдаланиш масаласини яна кун тартибига олиб чиқди.