Еврокомиссия раиси Урсула фон дер Ляен Латвияга ташриф буюрган пайтда Россия президенти Владимир Путин ҳақида кескин фикр билдириб, уни «тажовузкор» дея таърифлади. Бу ҳақда «The Guardian» нашри хабар берди.
Сиёсатчининг таъкидлашича, Европа келажакдаги эҳтимолий хавфларга тайёр бўлиши зарур.
Қайд этилишича, Еврокомиссия раҳбари Латвия бош вазири Эвика Силиней билан учрашувда Латвиянинг Европада дронларга қарши курашнинг ҳақиқий марказига айланганини алоҳида таъкидлаган ва мамлакатнинг минтақада НАТО хавфсизлигини мустаҳкамлашга қўшган ҳиссасини эътироф этдган.
У Европа фақат шарқий чегаралар ишончли ҳимояланган тақдирдагина хавфсиз бўлишини уқтириб, Европа Иттифоқини эҳтимолий таҳдидларга фаол тайёргарлик кўришга даъват этган.
«Путин — тажовузкор, унинг вакиллари йиллар давомида гибрид ҳужумлар ва киберҳужумлар орқали жамиятларимизга тажовуз қилиб келмоқда», — деди фон дер Ляен.
Еврокомиссия раиси, шунингдек, барқарорлик ва хавфсизликни таъминлаш учун тобора ортиб бораётган хавф-хатар ва таҳдидларга жавоб бериш тайёргарлигини ошириш устида шошилинч ишлаш зарурлигини таъкидлади.
«Афсуски, сизнинг мамлакатингиз ва бошқа Болтиқбўйи давлатлари бизни огоҳлантирган хавф-хатарлар ҳақиқатга айланди», — дея у сўзини якунлаган.