Пахта терими учун «тавсиявий» нарх белгиланди. Бу ҳақда Қишлоқ хўжалиги вазирлиги хабар берди.
Вазирлик маълумотига кўра, машина ёрдамида терилган пахтанинг ҳар килограмми учун 1 373 сўм, қўл меҳнатида эса 2 000 сўм тавсиявий нарх белгиланган. Шу билан бирга, кластер ва фермерлар теримчилар билан ўзаро келишув асосида мустақил равишда ҳам нарх белгилаши мумкин.
Қайд этилишича, пахта етиштириш харажатларини қоплаш мақсадида давлат бюджети ҳисобидан ҳар килограмм учун 1 000 сўм субсидия ажратилади. Бу тартиб теримчилар меҳнатини рағбатлантириш ва аграр соҳада барқарорликни таъминлашга қаратилган.
Шу муносабат билан вазирлик ижтимоий тармоқларда тарқалган «1 кг — 1 800 сўм» ҳақидаги хабарлар ҳақиқатга тўғри келмаслигини билдирди. Расмий идорага кўра, терим нархлари фақат расмий манбалар орқали жамоатчиликка етказилади.
Вазирлик ОАВ ва блогерларни ахборот тарқатишда холисликка амал қилишга, текширилмаган маълумотлар жамиятда чалкашлик келтириб чиқариши ва қонунчиликка кўра жавобгарликка сабаб бўлиши мумкинлигини эслатди.