Видеони Youtubeʼда томоша қилинг:
👉https://youtu.be/obZC0ILwV9I
Мустақилликнинг 34 йиллиги тантана қилинди
Мустақиллик байрамига аталган ҳукумат тадбирларининг барчаси одатдагидан бироз олдинроқ, 29 август куни бўлиб ўтди.
Бунга сабаб — Президент Ш.Мирзиёев 30 август куни Хитойга ШҲТ саммитида иштирок этиш ва Иккинчи жаҳон урушида қозонилган Ғалабанинг 80 йиллигига бағишланган парадни томоша қилиш учун 4 кунлик сафар билан кетди.
Байрам тантаналари Шавкат Мирзиёев Шаҳидлар хотираси хиёбонида қатағон қурбонларини ёд этиш маросимида иштирок этди ҳамда «Янги Ўзбекистон» боғида Мустақиллик монументи пойига гул қўйди.
Шу куни Президент Шавкат Мирзиёев янгидан барпо этилган муҳташам Ислом цивилизацияси марказини ҳам очиб берди.
Кечқурун Президент Мустақилликнинг 34 йиллигига бағишланган байрам тадбирида иштирок этиб, халқимизга табрик билан мурожаат қилди.
Ҳафта ичида Президент Шавкат Мирзиёев ўз фармонлари билан Мустақилликнинг 34 йиллиги муносабати билан турли соҳалар вакиллари фахрий унвонлар, орден ва медаллар билан мукофотлади.
27 август куни Тошкентда ушбу мукофотларни топшириш маросими бўлди.
Жумладан, Ўзбекистон мусулмонлари идораси раиси, муфтий Шайх Нуриддин Холиқназар «Олий даражали Имом Бухорий» ордени билан тақдирланди.
Бош прокурор Ниғматилла Йўлдошевга 2-даражали давлат адлия маслаҳатчиси унвони берилди. Ички ишлар вазири Азиз Тошпўлатов ва мудофаа вазири Шуҳрат Холмуҳаммедов генерал-лейтенант бўлди. ДХХ раиси ўринбосари Баҳром Рашидов генерал-майор унвонини олди. Адлия вазири Акбар Тошқулов «Дўстлик» ордени билан тақдирланди. Тақдирланганлар орасида вазирлар, ҳокимлар, шоирлар, журналистлар ва бошқа соҳа ходимлари бор.
Президент 523 нафар маҳкумни афв этди
Мустақилликнинг 34 йиллиги муносабати билан Президент Шавкат Мирзиёев 523 нафар маҳкумни афв этиш тўғрисида фармон имзолади. Бу айбини англаган ва қилмишидан пушаймон бўлган шахслар учун янги имконият сифатида баҳоланмоқда.
Фармонга кўра, 195 киши жазодан тўлиқ озод қилинди, 147 нафар шартли равишда эркинликка чиқарилди, 87 нафарнинг жазоси енгилроқ турга алмаштирилди ва 94 маҳкумнинг қамоқ муддати қисқартирилди. Афв этилганлар орасида 45 нафар аёл, 31 нафар қария ва 220 нафар ёшлар бор.
Тақиқланган ташкилотларда иштирок этган 15 шахс, 8 нафар чет эл фуқароси, жумладан, Тожикистон ва Сиерра-леонеликлар ҳам бор. Афв этилганлар профилактика, ижтимоий кўмак ва реабилитация билан қамраб олинади.
Ўзбекистон аҳолиси 38 миллион кишига етди
Миллий статистика қўмитаси 2025 йил 28 август куни Ўзбекистоннинг доимий аҳолиси 38 миллион кишидан ошганини маълум қилди. Бу Ўзбекистон аҳолиси билан боғлиқ янги тарихий марра сифатида қайд этилди.
Аҳолининг 19 миллион 136 минг 800 нафари эркаклар бўлса, 18 миллион 863 минг 200 нафари аёллардир. Яъни мамлакатимизда эркаклар сони аёлларга нисбатан 273 минг 600 нафарга кўп экани қайд этилди.
Ўзбекистон аҳолиси навбатдаги миллионга кўпайишига — 38 миллионга етиш учун 493 кун кифоя қилди. Аввал 36 млндан 37 миллионга етишимиз учун 501 кун кетганди.
Шу тенденция сақланадиган бўлса, аҳолимиз 2027 йилнинг январида 39 миллион, 2028 йилнинг май ойида яхлит 40 миллионлик маррага етамиз.
Москвада ўзбекистонлик муҳожир таҳқирланди — ТИВ муносабат билдирди
Москва областида россиялик шахс ўзбекистонлик таксист муҳожирни ҳақорат қилди. Ижтимоий тармоқларда тарқалган ва катта эътирозлар келтириб чиқарган видеода у ҳайдовчига: «Сен русларнинг қулисан!», «Ўзбекистонда ҳеч нарса йўқ, шунинг учун бизга келгансан» каби ҳақоратли сўзлар айтган. Ҳолат Москва областининг Химки шаҳридаги турар жой мажмуасида рўй берган.
Ўзбекистонлик муҳожир можарога жавоб бермасдан тинчланишни сўраган ва кетган. Гувоҳларга кўра, жанжал ҳайдовчи қисқа вақтга машинани ҳовли киришида тўхтатиб қўйганидан бошланган.
Воқеа Ижтимоий тармоқларда кенг муҳокамага сабаб бўлгач Ўзбекистон Ташқи ишлар вазирлиги расман муносабат билдиргани йўқ. Фақат вазирлик матбуот котиби томонидан тарқатилган муносабатда воқеа тўғридан тўғри тилга олинмаган бўлса-да, «фуқаролар дунёнинг исталган нуқтасида давлат ҳимоясида» эканлиги қайд этилган.
Депутатлар Тошкентда иссиқ сув ва иссиқлик тарифлари қимматлашишини маъқуллади
Халқ депутатлари Тошкент шаҳар кенгаши «Veolia Energy Tashkent» компаниясининг таклифини маъқуллаб, иссиқ сув ва иссиқлик таъминоти хизматлари учун тарифларни оширишга розилик берди.
Янги тарифлар аҳоли учун 15 фоизга, юридик шахслар учун 40 фоизга ва бюджет ташкилотлари учун 18,8 фоизга ошиши кўзда тутилган. Тарифлар 1 октябрдан кучга кириши мумкин ва бу қарор шаҳар ҳокими томонидан имзоланганидан сўнг 15 кун ичида амалга оширилади.
Компания раҳбари Севара Пардаева таъкидлашича, ҳозирги пайтда аҳоли реал тарифнинг фақат 18 фоизини тўламоқда, қолган қисми шаҳар бюджетидан субсидия орқали қопланмоқда. Ҳукумат 2030 йилгача субсидияларни босқичма-босқич тугатишни режалаштирган. 2024 йилда субсидиялар учун 1,97 трлн сўм ажратилган бўлиб, бу 2023 йилга нисбатан анча кўп. Агар тарифлар оширилмаса, келгусида янада катта миқдорда кўтарилиш эҳтимоли бор.
Зойир Мирзаев: «Sea Breeze — барчани мамнун қиладиган лойиҳа»
Тошкент вилояти ҳокими Зойир Мирзаев Чорвоқ сув омбори соҳилида амалга оширилаётган ва жамоатчиликда турли баҳс-мунозараларга сабаб бўлиб келаётган Sea Breeze Uzbekistan лойиҳаси тўғрисида фикр билдирди. Унинг таъкидлашича, ушбу муҳокамалар мутахассисларнинг масъулиятини янада оширган.
«Аввалига менда ҳам хавотир бор эди, аммо ифлос сувларни омборга оқизмасдан қайта ишлаш ва такроран фойдаланишга кафолат берилганидан кейин бу ташвишим анча камайди. Ҳоким сифатида менинг асосий мақсадим — туристлар сонини кўпайтириш ва вилоятда туризмдан даромадни оширишдир. Туризм эса табиат асраб қолинган жойларда ривожланади», — деди Мирзаев.
Тошкент метросида касса оператори лавозимлари тугатилади
Йил охирига қадар Тошкент метросидаги барча касса оператори лавозимлари босқичма-босқич тугатилади. Бунга сабаб электрон тўлов тизимлари ва автоматлаштирилган чипта банкоматлар жорий этилаётгани.
Дастлабки босқичда 204 нафар оператори штати қисқартирилди. Йил якунига қадар барча бекатларда банкоматлар ўрнатилади ва оператори лавозимлари тўлиқ бекор қилинади.
Қисқартирилаётган ходимларга бошқа соҳалар бўйича касб-ҳунар курслари таклиф қилинмоқда. Курс тўловлари метрополитен томонидан қопланади.
Хитойда 44 млн доллар пора олган амалдор ўлимга ҳукм қилинди
Хитойнинг Гуйлин шаҳри суди Лю Синтай исмли собиқ юқори лавозимли амалдорни 44 миллион доллар пора олгани учун ўлим жазосига ҳукм қилди. Чунки порахўр амалдорлар Хитойда ўлимга ҳукм қилинади.
Лю Синтай Ҳайнан провинцияси ва Шандонгда раҳбарлик қилган, давлат шартномалари ва мансаб эвазига катта миқдорда пул олган.
Суд қарорига кўра, Лю Синтай 2003–2024 йиллар оралиғида ўз ваколатларини суистеъмол қилган ва унга берилган пора 316 миллион юанни ташкил қилган. Унинг барча мол-мулки мусодара қилиниб, сиёсий ҳуқуқлари ҳам бутунлай чекланди.
Айбдор ўз жиноятини тан олгани, терговга ёрдам бергани ва пулларнинг асосий қисмини қайтаргани учун суд ўлим жазосини икки йилга кечиктириб ижро этишга қарор қилди.
Ўзбекистон ўсмирлар терма жамоаси Осиё чемпионатидан четлатилди
Тошкентда ўтаётган ўсмирлар ўртасидаги Осиё чемпионатида Ўзбекистон ҳандбол терма жамоаси мусобақадан четлатилди. Осиё ҳандбол федерацияси қарорга жамоа таркибидаги айрим ўйинчилар ҳужжатларида ноаниқликлар аниқланганини сабаб қилиб кўрсатди. Шу билан бирга, Ўзбекистоннинг гуруҳдаги барча натижалари бекор қилинди.
Ўзбекистон ҳандбол федерацияси эса қарорга рози эмаслигини билдириб, Халқаро ҳандбол федерациясига апелляция хатини йўллади. Федерациянинг таъкидлашича, терма жамоа ўз ҳақ-ҳуқуқини қонуний тарзда ҳимоя қилиш ниятида.
Роналду ва Жоржина никоҳ шартномаси тузди
Қарийб ўн йиллик муносабатдан сўнг Криштиану Роналду ва Жоржина Родригес расман турмуш қуришга қарор қилди ва никоҳ шартномаси имзолади.
Шартномага кўра, ажралиш ҳолатида Роналду Жоржинага ойига 114 минг доллар нафақа, Мадриддаги 5,6 млн долларлик вилла, люкс автомобиллар, авиапарвоз харажатлари ва фарзандлар учун ойига 500 минг доллар алимент тўлайди. Шунингдек, Жоржина 50 миллион долларлик бир марталик тўловга ҳам эга бўлади.
Жуфтликнинг беш нафар фарзанди бор. Forbes маълумотича, Роналдунинг бойлиги 671 миллион долларни ташкил этади.