1 сентябрдан бошлаб Шенген визаси ёки Европа Иттифоқининг бошқа давлати томонидан берилган яшаш гувоҳномаси билан келаётган учинчи давлатлар фуқаролари, жумладан ўзбекистонликлар, мамлакатга ташрифидан олдиндан хабар бериши шарт бўлади. Бу ҳақда «Дунё» АА хабар берди.
Латвия иммиграция тўғрисидаги қонунига киритилган ўзгаришларга кўра, Европа Иттифоқи давлатлари томонидан берилган Шенген визаси ёки яшаш гувоҳномаси асосида келаётган фуқаролар камида 48 соат олдин eta.gov.lv сайти орқали ўзлари ҳақида маълумот тақдим этиши шарт. Бу қоида Латвия орқали транзит сафарини амалга оширадиган йўловчиларга ҳам тааллуқли.
Кирувчи шахс сафар мақсади, бўлиш вақти ва манзили, йўналиш, алоқа маълумотлари, шунингдек, ўзи ёки қариндошларининг давлат идораларидаги лавозимлари ёки ҳарбий хизматдаги фаолияти ҳақида маълумот тақдим этиши лозим. Тасдиқ жавоби электрон почта орқали келади.
Латвия Ички ишлар вазирлигига кўра, нотўғри ёки тўлиқсиз маълумот тақдим этган чет элликлар маъмурий жавобгарликка тортилиши мумкин.
Янги тартиб дипломатик иммунитетга эга шахсларга ва хизмат вазифаси ёки техник ёрдам учун қисқа муддатга Латвияга келаётганларга татбиқ этилмайди.