Тянцзин шаҳрида Шанхай ҳамкорлик ташкилоти саммити доирасида Си Жинпинг ва Нарендра Модининг учрашуви икки давлат етакчилари орасидаги етти йиллик танаффусдан кейин илк мулоқот бўлди. Саммитда икки томон чегара масалалари муносабатларни белгилаб бермаслиги, стратегик ҳамкорлик эса келажак тараққиёти учун «тўғри йўл» эканини таъкидлади. Бу ҳақда Bloomberg нашри хабар берди.
Си Жинпинг Хитой ва Ҳиндистон рақиб эмас, балки ривожланиш имкониятлари сифатида бир-бирини кўриши кераклигини қайд этди. Унинг сўзларига кўра, «аждар ва фил бирга рақс тушса, икки давлат муносабатлари барқарор ўсади». Моди эса икки мамлакат ўртасида тўғридан-тўғри авиақатновлар тикланишини маълум қилди ҳамда сўнгги йилда чегарадаги қаршилик нуқталаридаги ҳарбийлар орқага чекинганидан кейин вазият барқарорлаша бошлаганини билдирди.
Учрашув АҚШ маъмуриятининг Ҳиндистон товарларига 50 фоизлик тариф жорий қилган пайтига тўғри келди. Вашингтон бу қарорни Ню-Деҳлининг Россия нефтини сотиб олишини баҳона қилиб изоҳламоқда. Ҳиндистон эса буни «нохақ» қарор сифатида баҳолаб, унинг экспортига оғир зарба беришини таъкидлади. Ўтган йили Ҳиндистон АҚШга 87 млрд долларлик маҳсулот экспорт қилган.
Ҳар икки томон савдо ва инвестиция алоқаларини кенгайтириш ҳамда савдо дефицитини қисқартиришга келишди. Мулоқот давомида Си Жинпинг кўп томонлама муносабатларни мустаҳкамлаш ва халқаро муносабатларда «кўпроқ демократия» тамойилларини қўллаб-қувватлаш зарурлигини урғулади.
Саммитда Россия, Эрон ва Покистон сиёсий етакчилари ҳам иштирок этди. Кузатувчиларнинг таъкидлашича, учрашув Ню-Деҳли ва Пекиннинг кўп йиллик низолардан кейин мулоқотга тайёр эканини намойиш этди. Бу эса икки давлат чегарасини демаркация қилиш бўйича август ойидаги келишувдан кейинги яна бир дипломатик ютуқ сифатида баҳоланмоқда.