Молдова Олий суд палатаси россияпараст сиёсий кучларнинг сайловда иштирок этишга оид барча даъволарини рад этди. Ушбу қарорлар мамлакатдаги сиёсий майдонда Илан Шорга алоқадор партияларнинг бутунлай четлатилишига олиб келди.
Newsmaker хабарига кўра, Олий суд палатаси 29–30 август кунлари «Уйғониш», «Moldova Mare» ва «Молдова марказчилар иттифоқи» партиялари томонидан берилган аризаларни кўриб чиқиб, сайловга қўймаслик ҳақидаги қарорни қўллаб-қувватлади.
Молдова Марказий сайлов комиссияси аввалроқ «Уйғониш» партиясининг номзодлар рўйхатини рад этган, чунки у Шорга алоқадор тўртта партия фаолиятини чеклаш тўғрисидаги апелляцион қарор асосида ҳаракат қилган.
«Moldova Mare» партияси эса номзодлар рўйхатидаги битта шахснинг судланганлиги сабаб чиқарилиши натижасида гендер миқдорий нисбатни бузган — 10 ўриндан 7 тасини эркаклар эгаллаган. Бу амалда қонун билан белгиланган 60/40 нисбатини бузганини англатади.
«Молдова марказчилар иттифоқи» партиясига келсак, унинг рўйхатидан икки номзод сўнгги муддатдан кейин партияни алмаштиргани аниқланган. Бу ҳолат уларнинг юридик мезонларга жавоб бермаслигини кўрсатган.
Молдова Олий суд палатасининг бу қарорлари якуний ҳисобланади ва қайта кўриб чиқилмайди. Бу билан Илан Шор ва унинг тарафдорлари сиёсий майдондан бутунлай четлатилди.