Россия Украинага қарши урушни тўхтатиш ниятида эмас. Бу ҳақда Россия Бош штаб бошлиғи Валерий Герасимов чиқиш қилиб, 2025 йил кузги даври учун ҳужум режалари тасдиқланишини билдирди.
Унинг сўзларига кўра, Россия қўшинлари Украинанинг Луҳанск областининг 99,7 фоиз, Донецкнинг 79 фоиз, Запорижжянинг 74 фоизи ва Херсоннинг 76 фоиз ҳудудларини назорат қилмоқда. Шу билан бирга, Украина ҳудудининг умумий 20 фоиз қисми Россия томонидан оккупация қилинган. Бироқ бу ерларнинг катта қисми урушнинг дастлабки ҳафталарида босиб олинган.
Герасимов 28 ва 30 август кунлари Киев ва бошқа шаҳарларга қилинган оммавий ракетали ҳужумларни қўллаб-қувватлаб, уларни «мудофаа саноати билан боғлиқ объектларга зарба» деб баҳолади. Аммо Киевдаги кўп қаватли уйдаги портлашда камида 25 киши ҳалок бўлган, шулардан 4 нафари болалар экани аниқланган.
Вашингтондаги CSIS таҳлил маркази Россия армияси 2022 йилдан буён 1 миллионга яқин жангчи йўқотганини, уларнинг 250 минг нафари ҳалок бўлганини ва 400 мингдан ортиғи ногирон бўлиб қолганини маълум қилган. Британия разведкаси ҳам шунга яқин рақамларни эълон қилган. «Медуза» ва «Медиазона» таҳлилларига кўра, 2025 йил августига қадар Украинада 220 минг рус ҳарбийси ҳалок бўлган.
The Economist маълумотларига кўра, Россия армияси ёзги ҳужумлар даврида ҳар бир 0,038 км² ер учун битта жангчини йўқотган. Бундай суръатда Донбасс ҳудудларининг тўлиқ оккупацияси 2029 йилдан аввал амалга ошмаслиги айтилмоқда. Умуман, шу суръатларда бутун Украинани тўлиқ босиб олиш учун яна 89 йил керак бўлади.