2025 йилнинг биринчи ярим йилида Россиянинг барча йирик нефт компаниялари фойдасининг 2–3 баробарга пасайгани маълум қилинди. Бу ҳақдаги расмий молиявий ҳисоботлар ўтган ҳафтада эълон қилинди.
«Роснефт» акциядорлар фойдаси 773 млрд рублдан 245 млрд рублга тушганини маълум қилди. Компания раҳбари Игор Сечиннинг сўзларига кўра, бунга сабаб санкциялар, экспорт чекловлари ва нефт нархининг тушаётгани.
Иккинчи йирик компания — «Лукойл» фойдаси икки баробар камайиб, 287 млрд рублни ташкил этди. «Газпром нефт» 54 фойдасидан мосуво бўлиб, 150 млрд рубл билан чекланди. «Сургутнефтегаз» эса умуман касодга учраб, 452 млрд рубл зарар кўрди.
«Татнефт»нинг фойдаси қарийб уч баробарга — 54,2 млрд рублгача тушиб кетди, «Русснефт»ники эса 3,2 баробарга ёки 11,8 млрд рублгача пасайди.
Давлат бюджетидаги ҳар учинчи рублни келтирадиган Россиянинг нефт-газ сектори умумий ҳисобда 50 фоиз фойдадан ажралган. Унинг салдоланган молиявий натижаси ярим фил ичида 1,264 трлн рублгача қисқарган. Корхоналарнинг 45 фоизи ярим йилликни зарар билан якунлаган.
Мамлакатдаги қазиб олишларнинг 40 фоизини ташкил этувчи Ханти-Мансийск автоном округида корхоналар ярим йилликни 506 млрд рубл зарар билан якунлаган.
Нефт ва газ экспортига эмбарго, долларда тўловларнинг блокланиши, G7 санкциялари, танкер етишмовчилиги ва логистика муаммолари Россия экспортини оғир аҳволга солди. 6 ойда Хитойга экспорт ҳажми 11 фоизга, қиймати эса 24 фоизга камайган.
Urals маркали нефт нархи баррелига 70 доллардан 52,1 долларгача тушди, рублда эса 30 фоизга арзонлашиб, 4,7 минг рублни ташкил қилди. Бу ҳолат экспорт тушумларига жиддий зарба берди.
Экспортнинг 80 фоизи кетаётган Осиё давлатларидан бошқалар нефт хомашёсини амалда харид қилмаяпти. Бироқ, шарқий йўналишда оқимни ошириш мураккаб: танкерлар етишмайди, портлар эса тўлиб тошиб кетган, дейишмоқда экспертлар.
«Нефт компанияларининг даромадлари қисқариши энг аввало жаҳон бозорларида нефт нархининг қулаши ва рубл курсининг мустаҳкамланиши билан боғлиқ, — дея тушунтиради Миллий энергетика хавфсизлиги фондининг етакчи таҳлилчиси Игор Юшков. — Бунинг натижасида экспорт тушуми қисқариб кетди: компаниялар хорижга ўша-ўша маҳсулот ҳажмини сотаётган бўлса-да, камроқ пул ишлашмоқда».