Президент Шавкат Мирзиёев Хитой Халқ Республикаси раиси Си Жинпинг таклифига биноан расмий ташриф билан Тианжин шаҳрига етиб борди. Бу ҳақда президент матбуот хизмати хабар берди.
Давлат раҳбарини «Бинҳай» халқаро аэропортида Хитой транспорт вазири Лю Вэй ва бошқа расмийлар кутиб олди. Тантанали маросимда икки мамлакат байроқлари кўтарилди ва фахрий қоровул саф тортди.
Ташриф доирасида Шавкат Мирзиёев 31 август – 1 сентябр кунлари Шанҳай ҳамкорлик ташкилоти Давлат раҳбарлари кенгашининг навбатдаги мажлиси ҳамда «ШҲТ плюс» форматидаги саммитда иштирок этади. Унда минтақавий хавфсизлик, иқтисодий ҳамкорлик ва транспорт йўлакларини ривожлантириш масалалари муҳокама қилиниши кутилмоқда.
Шунингдек, президент Пекинда Япониянинг Иккинчи жаҳон урушидаги мағлубиятининг 80 йиллигига бағишлаб ташкил этиладиган ҳарбий парадда қатнашади. Бу тадбирда турли мамлакатлар етакчилари ва ҳарбий делегациялар ҳам иштирок этиши белгиланган.
Ташриф доирасида икки томонлама учрашувлар, савдо-иқтисодий ва инвестициявий ҳамкорликни янада кенгайтириш масалалари ҳам муҳокама қилинади.