Ўзбекистоннинг 34 йиллик мустақиллик байрами муносабати билан президент Мирзиёев номига нуфузли давлат ва ташкилотлар раҳбарларидан табриклар келмоқда. Бу ҳақда давлат раҳбари матбуот хизмати хабар берди.
Келиб тушаётган табрик мактубларида Янги Ўзбекистонда амалга оширилаётган кенг кўламли ислоҳотлар стратегияси натижалари, минтақада дўстлик, шериклик ва яхши қўшничилик муҳитини мустаҳкамлаш, шунингдек, дунё мамлакатлари билан ўзаро манфаатли ҳамкорликни кенгайтиришга қаратилган прагматик ва конструктив ташқи сиёсат юқори баҳоланган.
Мулоқотларда ижтимоий-иқтисодий соҳаларда эришилган ютуқлар, давлат ва жамият ҳаётининг барча жабҳаларидаги муваффақиятлар, шунингдек, Ўзбекистоннинг халқаро майдонда нуфузининг ортиб бораётгани алоҳида қайд этилган. Шу билан бирга, кўп миллатли халқимизга тинчлик-осойишталик, фаровонлик ва равнақ тилаклари билдирилган.
Президентга қутлов йўллаганлар орасида Россия президенти Владимир Путин, Хитой раиси Си Жинпинг, АҚШ президенти Доналд Трамп, Қозоғистон президенти Қосим-Жомарт Тоқаев, Қирғизистон президенти Садир Жапаров, Тожикистон президенти Эмомали Раҳмон, Туркманистон президенти Сердар Бердимуҳамедов, Туркман халқи миллий етакчиси Гурбангули Бердимуҳамедов, Озарбойжон президенти Илҳом Алиев, Беларус президенти Александр Лукашенко, Туркия президенти Ражаб Тоййиб Эрдўғон, Ҳиндистон бош вазири Нарендра Моди, Миср президенти Абдулфаттоҳ ас-Сиси, Эрон президенти Масъуд Пезешкиён, Покистон бош вазири Шаҳбоз Шариф, Корея президенти Ли Чже Мёнг, Европа кенгаши президенти Антониу Кошта, Германия президенти Франк-Вальтер Штайнмайер, Италия президенти Серджо Маттарелла каби давлат ва ҳукумат раҳбарлари бор.
Шунингдек, Арманистон бош вазири Никол Пашинян, Саудия Арабистони подшоҳи Салмон ибн Абдулазиз Ол Сауд ва валиаҳд, бош вазир Муҳаммад ибн Салмон Оль Сауд, Покистон президенти Осиф Али Зардорий, БАА президенти Шайх Муҳаммад бин Зоид Ол Нахайон, БАА бош вазири, Дубай ҳокими Шайх Муҳаммад бин Рошид Оль Мактум, БАА вице-президенти Шайх Мансур бин Зоид Ол Нахайон, Болгария президенти Румен Радев, Ирландия президенти Майкл Хиггинс, Сербия президенти Александр Вучич, Словения президенти Наташа Пирц Мусар, Словакия президенти Питер Пеллегрини, Латвия президенти Эдгарс Ринкевичс, Черногория президенти Яков Милатович, Чехия президенти Пётр Павел, Швейцария президенти Карин Келлер-Цуттер, Эстония президенти Алар Карис, Гуржистон президенти Михаил Кавелашвили, Босния ва Герцеговина президиуми раиси Желко Комшич, Буюк Британия қироли Чарльз III, Япония императори Нарухито, Бельгия қироли Филипп, Испания қироли Фелипе VI, Марокаш подшоҳи Муҳаммад VI, Камбоджа подшоҳи Нородом Сиамони, Мўғулистон президенти Ухнаагийн Хурэлсух, Сингапур президенти Тарман Шанмугаратнам, Вьетнам президенти Лионг Киёнг, Таиланд бош вазири вазифасини бажарувчи Пхумтхам Вечаячай, Фаластин президенти Маҳмуд Аббос, Афғонистон бош вазири Муҳаммад Ҳасан Оҳунд ҳам ўз табрикларини йўллашди.
Бундан ташқари, Шанхай ҳамкорлик ташкилоти бош котиби Нурланбек Ермекбоев, Туркий давлатлар ташкилоти бош котиби Кубаничбек Омуралиев, Мустақил давлатлар ҳамдўстлиги бош котиби Сергей Лебедев, Иқтисодий ҳамкорлик ташкилоти бош котиби Асад Хон, Ислом ҳамкорлик ташкилоти бош котиби Ҳусайн Иброҳим Тоҳа, Ислом дунёси таълим, фан ва маданият ташкилоти бош директори Салим ал-Малик ҳамда БМТ Озиқ-овқат ва қишлоқ хўжалиги ташкилоти бош директори Сюй Дунюй ҳам табрик йўллади.