Украина Олий Радасининг собиқ спикери Андрий Парубийнинг қотиллигида гумонланган шахс 30 август куни Лвивда содир этилган жиноятдан 36 соат ўтиб, Хмелницкий областида қўлга олинган. Бу ҳақда президент Володимир Зеленский ҳамда Украина ИИВ раҳбари Игорь Клименко ва СБУ раҳбари Василий Малюк маълум қилди.
Зеленскийнинг айтишича, тергов жараёни ҳозирча давом этмоқда, бироқ жамоатчиликка бор маълумотлар тақдим этилиши лозим. У қотилликка оид барча ҳолатлар аниқлаштирилиши шартлигини таъкидлади. Давлат раҳбари бу ишни шахсан назорат қилиб бораётганини билдирди.
ИИВ раҳбари Клименко ҳодиса олдиндан пухта режалаштирилганини маълум қилди. Гумонланувчи Парубийнинг ҳаракатларини кузатиб, маршрут тузган ва қочиш режасини ишлаб чиққан. Полиция ва СБУ ходимлари 24 соат ичида қотил изига тушган ва яна 12 соатдан сўнг уни қўлга олган.
СБУ раҳбари Малюк қўлга олиш амалиётига СБУ, Миллий полиция ва Бош прокуратура ходимлари жалб қилинганини билдирди. Президент бу иш бўйича барча манбалардан ҳисобот олиб бормоқда.
Кейинроқ Зеленский Бош прокурор Руслан Кравченкодан гумонланувчининг дастлабки кўрсатмалари ҳақида ҳисобот олганини маълум қилди.