Халқаро шахмат федерацияси (FIDE) август ойи учун янгиланган дунё рейтинги натижаларини эълон қилди. Унга кўра, Нодирбек Абдуссатторов бир неча ойдан бери сақлаб келаётган дунёнинг энг кучли ўн шахматчиси қаторидаги ўрнини бой берди ва 11-поғонада жой олди. Унинг шахсий рейтинги 2771 дан 2748 га тушган.
Топ-100 талик рўйхатда яна тўрт нафар ўзбекистонлик гроссмейстерни ҳам кўриш мумкин. Улар орасида энг катта ўсишни Нодирбек Ёқуббоев намойиш қилди. У 2681 очко тўплаган ва 59-ўриндан 45-поғонага кўтарилиб, Рустам Қосимжоновни (2675) ортда қолдирган.
Жавоҳир Синдоров ҳам бир поғона юқорилаб, 25-ўриндан 24-ўринга кўтарилган ва 2722 очко жамғарган. Шамсиддин Воҳидов эса аксинча, натижаларини ёмонлаштириб, 76-ўриндан 83-поғонага тушиб кетган. Унинг ҳозирги кўрсаткичи — 2645 очко.
Ўзбекистон шахматчилари жамоавий рейтингда 2601 очко билан дунёнинг 13-ўринидан жой олган.
Жаҳон шахматида етакчилик ўзгармаган — норвегиялик Магнус Карлсен 2839 очко билан биринчи ўринда қолмоқда. Ундан кейинги ўринлардан америкалик Ҳикару Накамура (2807) ва Фабиано Каруана (2789) жой олган.