Техник жиҳатдан тартибга солиш агентлиги Пискент синов мажмуасида текширув амалиёти шу йили 2 сентябрдан тўхтатилишини маълум қилди. Унга кўра, амалиёт расмий дистрибюторлик ва сервис марказлари сони кескин ошганлиги ҳамда истеъмолчиларнинг расмий дистрибюторлар билан ишлаш амалиёти яратилгани сабабли бекор қилинган.
Пискент полигони ҳақида иқтисодчи Отабек Бакиров муносабат билдиради.
«Пискент полигони худди эски замоннинг ёвуз символлари каби бўлиб қолган эди. Шу маънода полигонда импорт автомобиллар синови тўхтатилиши кўпчиликда умид уйғотади», — деди у.
Агентлик хабарда 2024 йилгача Ўзбекистонда атиги 3 та дистрибюторлик маркази фаолият юритгани, улар фақат 15 та автомобил модели учун турни тасдиқлаш тўғрисидаги ҳужжатларга эга бўлганини тушунтиради.
Ҳозирда расмий дистрибюторлар сони 21 тага етди ва 100 дан ортиқ автомобил моделларига турни тасдиқлаш тўғрисидаги ҳужжатлар берилгани таъкидланди. Шунингдек, аҳолига автомобил харидини расмий дистрибюторлар орқали амалга ошириш тавсия қилинган.
Бироқ иқтисодчилар бу қарордаги бўшлиқлар юзасидан савол билан юзланмоқда. Жамоатчилик фаоли Шухрат Қурбонов блогида шундай ёзмоқда:
«Янгилик, албатта, яхшидек кўринади, лекин мен тушунмадим, сертификатлаш энди зарур бўлмагани учун бекор қилиняптими ёки дистрибюторлар сони кўпайиб кетгани учунми? Ўзи учун битта автомобил олиб келаётганлар энди нима қилиши керак?» — дейди у.
Иқтисодчи Отабек Бакиров ҳам шундай савол билан мурожаат қилди: «Моккилар ёки жисмоний ва юридик шахслар ўз эҳтиёжи учун импорт қилган автомобилларга энди қандай тартиб қўлланилади? Ёки бу тоифага импорт тақа-тақ тақиқланадими? Қайси асосларда?»
Агентликнинг Kun.uz’га маълум қилишича, импорт автомобилларни синовдан ўтказиш буткул тўхтатилади ва уни аввалгидек Божхона ҳудудида қайта тиклаш кўзда тутилмаган.
Маълумот учун, аввалроқ ADM Jizzakh электромобиллар импорти учун божларни қайтаришни таклиф қилган эди. Унга кўра, Ўзбекистонда электромобил ишлаб чиқариш мақсадга мувофиқ эмас, чунки бу қимматга тушади.
Бироқ бунинг ўзи етарли эмас. Агентлик фақатгина автосиновлар амалга ошириш билан чекланмаган, Пискент полигонида болалар учун тагликлардан тортиб маиший техникаларгача текширув қилинган. Энди бу жараён нима бўлади?
Бундан ташқари, автосиновлар бекор бўлиши ҳақида ҳеч қандай расмий меъёрий ҳужжат эълон қилинмади.
Содда қилиб айтганда, автоқисмлар текшируви, расмий меъёрий ҳужжат, жисмоний ва юридик шахсларнинг импорт қилган автомобили қандай қўлланилиши ҳақида маълумотлар ҳозирча номаълум. Агентликка мазкур саволларга жавоб олиш учун мурожаат қилдик, бироқ қўнғироқларимизга жавоб берилмади.
Эслатиб ўтамиз, 2024 йил 1 ноябрдан бошлаб Техник жиҳатдан тартибга солиш агентлиги импорт қилинган автомобилларни техник кўрикдан ўтказиш тартибини ўзгартирганди. Унга кўра, хориждан олиб кириладиган транспорт воситалари божхона ҳудудида эмас, балки Тошкент вилоятининг Пискент туманидаги автомобиль полигонида синовдан ўтказилиши белгиланганди.
Тартиб расмий дистрибютор бўлмаган жисмоний шахслар ва хусусий тадбиркорлар томонидан импорт қилинадиган автомобилларга нисбатан татбиқ этилган. Бу эса полигон йўлида автомобилларнинг узун навбатига сабаб бўлган эди. Автомобил эгалари жараён узоқ давом этгани учун машиналарда тунаб қолишга ҳам мажбур бўлишган.
Маҳлиё Ҳамидова тайёрлади.