Шанҳай Ҳамкорлик Ташкилоти (ШҲТ) мамлакатлари янги молиявий тузилма — ШҲТ Ривожланиш банкини ташкил этиш бўйича келишувга эришди. Бу ҳақда Тианжин шаҳрида бўлиб ўтган давлат раҳбарлари саммити якунларида қабул қилинган декларацияда баён этилган.
Ҳужжатда айтилишича, «манфаатдор давлатлар ШҲТ Ривожланиш банкини ташкил этиш зарурлигини тасдиқлайди ва янги молиявий институтнинг фаолиятини йўлга қўйиш бўйича маслаҳатлашувларни жадаллаштиришга келишиб олган».
Россия президенти Владимир Путин саммитдан аввал ШҲТ мамлакатлари ўртасида ягона тўлов тизимини яратиш таклифини билдирган, шунингдек, ягона облигациялар чиқариш ва қўшма инвестиция лойиҳалари учун алоҳида банк ташкил этиш ташаббусини илгари сурган эди.
Россия Тўғридан тўғри инвестициялар жамғармаси раҳбари Кирилл Дмитриев эса 1 сентябрда россиялик банк карталари ШҲТ мамлакатларида тобора фаолроқ қабул қилиниши мумкинлигини таъкидлаган.
Шу билан бирга, декларацияда халқаро молиявий тизимни ислоҳ қилишга қаратилган саъй-ҳаракатлар қўллаб-қувватланган. Айни пайтда, Халқаро тикланиш ва тараққиёт банки ҳамда Халқаро валюта жамғармаси каби институтларда ривожланаётган мамлакатларнинг иштироки ва роли кучайтирилиши кераклиги таъкидланган.
Бундан ташқари, ШҲТ доирасида миллий валюталардан фойдаланишни кенгайтириш бўйича «йўл харитаси»ни босқичма-босқич амалга ошириш муҳимлиги алоҳида қайд этилган.