The Guardian хабарига кўра, айсберг яқин ҳафталарда бутунлай йўқолиши мумкин. У аввал «мегаайсберг» сифатида танилган бўлиб, оғирлиги бир трлн тонна атрофида эди. Ҳозирда эса унинг майдони ярмидан камайиб, 1 770 km квадратни ташкил этмоқда. Европа Иттифоқининг Коперник дастури суратларида унинг юзаси 60 km кенгликда экани кўрсатилган.
Сўнгги ҳафталарда айсбергдан 400 km квадратлик улкан бўлаклар ажралиб чиққан. Британия Антарктика тадқиқот маркази океанографи Эндрю Мейжерс маълумотича, айсберг шимолга силжиши билан жадал суръатда парчаланмоқда.
A23a илк бор 1986 йилда Антарктида шелфидан ажралган, аммо Уэдделл денгизи тубида 30 йилдан ортиқ қотиб қолган. Фақат 2020 йилдан кейин сузиб кета бошлаган ва кучли океан оқимлари орқали Жанубий Атлантикадаги “айсберг йўлаги”дан ўтган.
2025 йил бошида айсберг Жанубий Жоржия ороли яқинида тўхтаб қолиб, пингвин ва тюлен колониялари учун хавф туғдирган. Кейин май ойида у яна ҳаракатга келиб, бир кунда 20 km гача масофани босиб ўтган ҳолда шимолга йўналган.
Олимлар айсбергнинг парчаланишини илиқ сувлар ва кучли тўлқинлар таъсири билан изоҳламоқда. Уларга кўра, A23a шунча вақт яхлит ҳолда сақланиб қолиши ҳайратланарли ҳол. Шу билан бирга, айсбергларнинг эриш суръати инсон фаолияти сабаб бўлаётган глобал иқлим ўзгариши билан боғланмоқда.