АҚШ президенти Доналд Трамп навбатдаги ултиматум муддати якунланишидан аввал Россия президенти Владимир Путиндан умидлари сўнганини билдирди. Унинг сўзларига кўра, Россия урушни тўхтатишни хоҳламаётгани сабабли, минглаб одамлар ҳаётдан кўз юммоқда. «Бу бемаъни уруш. Америкаликлар эмас, руслар ва украиналиклар ўляпти», — деди Трамп Salem Radioга берган интервюсида.
АҚШ президенти ҳар ҳафта фронтда тахминан 7 минг киши ҳалок бўлаётганини таъкидлади ва вазиятга таъсир кўрсатиш учун «бирор иш қилиш» нияти борлигини билдирди. Унинг таъкидлашича, бу фақат Украина эмас, балки бутун дунёда одамларнинг қандай яшаши ҳақидаги масаладир.
Трамп аввалроқ, 22 августда икки ҳафта ичида уруш барҳам топмаса, «жуда муҳим қарор» қабул қилишини айтганди. Ушбу муддат 5 сентябрда якунланади. Президент эҳтимолий чоралар сифатида «улкан санкциялар, улкан тарифлар ёки ҳар иккисини» санаб ўтди.
Бу Трампнинг Москвага қўйган биринчи шартлари эмас. 14 июлда у 50 кунлик, 29 июлда эса 10 кунлик ултиматум белгилаган ва Россия ҳамкорларига нисбатан 100 фоизли божлар қўллаш билан таҳдид қилган эди. Аммо кейин дипломатик имкониятларни сақлаш учун санкциялар ортга сурилган.
Бу орада, 28 август куни Россия Киевдаги фуқаролик объектларига кучли ракетали ва дронлар ҳужуми уюштирди. Бир уйга урилган ракета оқибатида 25 киши ҳалок бўлди, жумладан 4 нафар бола. 60 нафардан ортиқ одам тан жароҳати олди.