Истиқболли лойиҳалар миллий агентлиги маълумотларига кўра, ўтган йилнинг шу даврига нисбатан бозор 46 фоизга ўсган.
Умумий суғурта сегменти бозорнинг 94 фоизини эгаллаб турган бўлса, ҳаётни суғурталаш 384,22 млрд сўмга етди ва 385 фоиздан зиёд ўсиш қайд этди. Шу билан бирга, ҳаёт суғуртаси улуши 6,16 фоизни ташкил қилди.
Умумий суғурта сегментида йиғилган мукофотлар 5,85 трлн сўмни ташкил этиб, 39,6 фоизга ошган. Аммо энг катта суръат ҳаётни суғурталашда кузатилди: мукофотлар 384,22 млрд сўмга етди, бу ўтган йилга нисбатан қарийб 4 баробар кўпдир.
Шу билан бирга, янги ҳисобот даврида суғурта тўловлари ҳам ўсди. Жами тўловлар 1,24 трлн сўмни ташкил этиб, 11,6 фоизга кўпайди. Умумий суғурта сегментида тўловлар 1,18 трлн сўмга етган бўлса, ҳаётни суғурталаш бўйича тўловлар 64,46 млрд сўмгача пасайди.
Июн якунига кўра, суғурта ташкилотларининг жами мажбуриятлари 2,98 квадриллион сўмга етди, бу ўтган йилга нисбатан қарийб 45 фоиз кўп. Сектордаги инвестициялар 8,34 трлн сўмдан ошиб, асосан депозитлар (60,9 фоиз), қимматли қоғозлар (16,7 фоиз) ва кўчмас мулкка (18,7 фоиз) йўналтирилди.
Ҳисобот даврида бозорда 34 та компания фаолият кўрсатган. Умумий суғурта сегментида Apex Insurance 1,08 трлн сўм мукофот йиғиб етакчи бўлди. Ундан кейин «My-Insurance» (354,54 млрд сўм) ва «UzbekInvestт» (312,3 млрд сўм) қайд этилди.
Ҳаётни суғурталашда «Apex Life Insurance» 248,24 млрд сўмлик мукофот билан биринчи ўринни эгаллади. «TBC Sug‘urta» ва «Alfa Life Insurance» эса мос равишда 38,55 млрд ва 18,04 млрд сўм йиғди.
Фаол шартномалар сони бўйича «My-Insurance» 1,27 млн шартнома билан биринчи, «Apex Insurance» эса 1,23 млн шартнома билан иккинчи ўринда қайд этилди.