Россияда нефт саноатига таянган иқтисодиёт ўз ҳаётининг охирги босқичига кирмоқда. «Роснедр» раҳбари Олег Казанов давлат кенгаши энергетика комиссиясида маълум қилишича, мамлакатдаги фойда келтирадиган аниқланган нефт захиралари ҳозирги даражадаги қазиб олиш билан бор-йўғи 25 йилга етади. Унинг сўзларини «Известия» нашри келтирмоқда.
Россияда умумий 81,6 млрд тонна деб баҳоланаётган захираларнинг атиги 13,2 млрд тоннаси иқтисодий жиҳатдан мақбул ҳисобланади. Бугунги кунда 96 фоиз қазиб олинадиган майдонлар фойдаланувчиларга топширилган. «Ҳар қанча рағбатлантирмайлик, амалдагилар тугайди», — деди Казанов.
2023 йилда аниқланган 39 та янги коннинг жами захираси 21 млн тоннани ташкил этди. Бу кўрсаткич ҳозирги ишлаб чиқариш суръатида атиги икки ҳафтада қазиб олинади. Энергетика таҳлилчиси Михаил Крутихинга кўра, бу конлар ҳам тўлиқ геологик тасдиққа эга эмас.
Ўтган йилда 592 млн тонна янги захира ҳисобга олинган, аммо улар асосан совет даврида очилган конларни қайта ўрганиш ва янги қудуқлар қазиш орқали аниқланган. Яқин келажакда янги тадқиқот майдонлари қолмаётгани қайд этилмоқда.
Россия ҳукумати 2050 йилгача мўлжалланган энергетика стратегиясида вазиятга ечим излаяпти. Лекин инвестиция ва технологиялар бўлмаса, қазиб олиш 2050 йилгача 287 млн тоннага тушади. «Стресс-сценарий»да бу кўрсаткич атиги 171 млн тоннагача пасайиши ва экспортнинг тўхташи кутилмоқда.
Нефтдан даромад камайса, ҳукумат ё солиқни камайтириш орқали компанияларни қўллаб-қувватлаши, ёки бюджетига катта зарба бериш эҳтимоли бор.