Тошкент вилоятининг Ўрта Чирчиқ ва Қуйи Чирчиқ туманларида қуриладиган янги халқаро аэропорт учун деярли 1310 гектар ер майдони ажратилади. Бу ҳақда Кадастр агентлигининг Тошкент вилояти бўйича бошқармаси хабар берди.
Маълумотга кўра, Ўрта Чирчиқ туманида 790,76 ha, Қуйи Чирчиқ туманида эса 519 ha ер ажратилади. Ушбу ерларнинг 1075,45 гектари суғориладиган ерлар, 112,69 гектари боғ майдонлари, 0,65 гектари яйлов ва пичанзорлар, қолган 120,97 гектари эса бошқа мақсадлардаги ерлардан иборат.
1 август куни Президент фармони билан янги аэропорт қурилиши бошлангани эълон қилинган эди. Лойиҳага кўра, аэропорт биринчи босқичда йилига 20 млн нафаргача йўловчига хизмат кўрсата олади, 169 та самолётни бир вақтнинг ўзида қабул қилиш имкониятига эга бўлади ва соатига 40 дан ортиқ қўниш ва учиш амалга оширилади.
Uzbekistan Airports бошқаруви раиси Жавлонбек Умархўжаевнинг таъкидлашича, янги аэропорт тўлиқ рақамлаштирилади ва замонавий технологиялар асосида барпо этилади. Транспорт вазири Илҳом Маҳкамовнинг сўзларига кўра, аэропорт Тошкентнинг амалдаги ҳаво бекатидан 17 км жанубда, М-39 автомагистрали ва келажакдаги Тошкент–Самарқанд пулли йўли йўналишида жойлашади.
Август ойи ўрталарида Тошкент вилояти ҳокими Зоир Мирзаев лойиҳа жами 1200 гектар майдонда амалга оширилишини маълум қилган эди.
Эслатиб ўтамиз, Тошкентнинг янги аэропортидан ташқари, 2026 йилда Бухоро ва Урганчда ҳам янги халқаро аэропортлар қурилиши бошланиши режалаштирилган.