АҚШ президенти Доналд Трамп Россияга нисбатан босимнинг иккинчи ва учинчи босқичларига ҳали ўтмаганини билдирди. Бу ҳақда у Оқ уйда журналистлар билан суҳбатда айтиб ўтди. Трамп бу баёнотини уни танқид қилган репортёр сўровига жавоб тариқасида билдирди.
«Сиз буни ҳаракатсизлик деб атайсиз, лекин мен ҳали иккинчи ёки учинчи босқичга ўтмадим. Агар ҳаракат бўлмаяпти десангиз, ўзингизга янги иш топинг», — деди у қаттиқ oҳангда.
Трамп Россияга босим намунаси сифатида Ҳиндистонга жорий этилган 50 фоизлик бож тўловларини келтирди. Унга кўра, бу божлар Россия иқтисодиётига жиддий зарар етказмоқда ва уларнинг қиймати «юзлаб миллиард доллар»га тенг. АҚШ раҳбари таъкидлаганича, агар Владимир Путиннинг Украина бўйича қарори АҚШни қониқтирмаса, «дунё нима бўлишини кўради».
2025 йил 27 августдан бошлаб АҚШ Ҳиндистондан олинадиган товарларга 50 фоизлик божни амалга оширди. Бу қарор Ню Деҳлининг Россия нефт импортини тўхтатмагани сабабли қабул қилинган. Бунга қарамай, Ҳиндистон ҳукумати Nayara Energy компаниясига (унинг 49,13 фоизи «Роснефт»га тегишли) Эрон ёки Россия суғурта ширкати орқали танкер ишлатишга рухсат берди. Шунингдек, Европа Иттифоқи санкциясига тушган кемалар ёрдамида ҳам Россия нефт импортини амалга оширишга ижозат берилган.