Ижтимоий тармоқларда тарқалган «Тадбиркор қурилишдаги коррупция ҳақида» номли видеопост юзасидан Кадастр агентлиги расмий баёнот эълон қилди. Баёнотда агентлик тадбиркор томонидан илгари сурилган айбловларни қатъий рад этган.
Кадастр агентлиги маълум қилишича, қурилиш учун рухсатнома бериш жараёнларида улар иштирок этмайди. Тадбиркор видеода келтирган ҳолатдаги айрим жараёнлар нотўғри талқин қилинган. Хусусан, ер сотиб олингач, кадастр идоралари фақат ерга бўлган ҳуқуқни икки иш куни ичида рўйхатдан ўтказиб беради — бу қурилишга рухсатнома бериш дегани эмас.
Қўшимча қилинишича, кадастр идоралари қурилиш ишлари тўлиқ якунланганидан сўнг, кўчмас мулкни ўлчаб, кадастр паспортини шакллантиради. Кейин фақат тегишли давлат ташкилотлари фойдаланишга рухсат бергандан сўнггина, кўчмас мулкка бўлган ҳуқуқлар давлат рўйхатига олинади.
Агентлик тизимда шаффофликни таъминлаш бўйича қатъий чоралар кўрилаётганини қайд этар экан, коррупция ҳолатларини кескин қоралашини билдирган. Шу билан бирга, фуқаролар ва тадбиркорларга мурожаат қилиб, агар ҳақиқатдан ҳам коррупция ҳолатига дуч келсалар, ҳуқуқни муҳофаза қилувчи органларга мурожаат қилиш зарурлигини уқтирган.
«Ўзбекистон Республикаси қонунчилигига кўра, пора олган ҳам, берган ҳам жавобгарликка тортилади», — дейилади расмий муносабатда.