Хитойлик олимлар дунёда илк бор инсон танасининг ҳароратидан электр энергияси ишлаб чиқара оладиган «термоэлектр резина»ни ихтиро қилишди. Бу кашфиёт келгусида ақлли соатлар, тиббий сенсорлар ва турли кийиб юрадиган қурилмаларни узлуксиз қувват билан таъминлаши мумкин, дея хабар бермоқда South China Morning Post.
Пекин университети тадқиқотчилари ишлаб чиққан материал яримўтказгич полимерлар ва эластик резина уйғунлигига асосланган. Нанотола тармоғи тузилиши туфайли у юқори электр ўтказувчанликни сақлаган ҳолда 850 фоизгача чўзилиши мумкин. Шаклини 90 фоизгача тиклаш хусусияти эса уни табиий резинага яқинлаштиради.
Олимлар таъкидлашича, бундан олдинги термоэлектрик материаллар ё қаттиқ, ёки чўзилганда самарасиз бўлган. Янги технология эса тананинг 37 даража атрофидаги иссиқлиги ва ташқи муҳит ҳарорати ўртасидаги фарқдан электр энергияси олиш имконини беради. Бу жараён Ватт ихтиро қилган буғ двигателидаги каби иссиқликдан энергия олиш принципига асосланган.
Мутахассисларнинг фикрича, ушбу материал кийим-кечакка жорий этилса, телефонни қўл чўнтагидан қувватлаш мумкин бўлади. Шунингдек, у организм ҳароратини ташқи муҳитга узатиб, кийимнинг ўзини ҳам кондиционер вазифасида ишлатиш имконини бериши мумкин.
Тиббий соҳада ҳам қўлланиш эҳтимоли катта. Масалан, юрак-қон томир текширувларида бемор ҳафталаб батареяли ускуналар тақишига тўғри келади. Янги резина эса батареясиз, танага яқин жойлаштирилган сенсорларга узлуксиз қувват бериши мумкин.