5 сентябр куни бўлиб ўтган Олий Мажлис Сенатининг ўнинчи ялпи мажлисида бош прокурор Ниғматилла Йўлдошев камбағалликни қисқартириш бўйича дастурларнинг бажарилишида жиддий камчиликлар аниқланганини маълум қилди. Унга кўра, айрим мутасаддилар масалага жиддий ёндашмаган ва натижада ҳисоботларга сохта маълумот киритилган.
Прокуратура текширувлари давомида 78 та ҳолатда 12 млрд сўм иш ҳақи талон-торож қилингани фош этилди. Шунингдек, фуқароларга тўланмаган 11 млрд сўм иш ҳақи қайтарилиб берилди. Йўлдошевнинг айтишича, ўтган йили прокуратура органлари 29 мингдан ортиқ тадбиркор ва инвесторга амалий ёрдам кўрсатган. Бу жараёнда 7 мингдан зиёд янги корхона очилиб, 8 мингга яқинининг фаолияти тикланишига кўмаклашилган, натижада 22 минг иш ўрни яратилган.
Шу билан бирга, тадбиркорликка тўсқинлик қилиш билан боғлиқ 22 минг ҳолат аниқланган ва улар бўйича кескин чоралар кўрилган. Прокуратура органлари яширин иқтисодиётни қисқартириш бўйича ҳам бир қатор вазифаларни бажарди. Хусусан, 3 трлн 449 млрд сўмлик солиқ тўлашдан бўйин товлаш ҳолатлари очилиб, айбдорлар жавобгарликка тортилиши таъминланди.
Йўлдошев таъкидлашича, кейинги беш йилда инфляция 60 фоизга ўсган бўлса-да, йирик солиқ тўловчилар тоифасига киритиш мезонлари ўзгартирилмаган. Бу сабабли йирик корхоналарнинг қарийб 75 фоизи барча солиқ тушумларининг атиги 5 фоизини тўлаб келган. Бош прокуратура таклифларидан сўнг мезонлар уч баробар оширилиб, 1300 та йирик солиқ тўловчи ҳудудий бошқармаларга ўтказилди. Натижада улардан ойлик 200 млрд сўмдан ортиқ қўшимча солиқ тушуми таъминланди.