Centrum Air 6 сентябр куни Тошкент халқаро аэропортига учинчи кенг фюзеляжли Airbus A330−300 самолётини қабул қилди. Ушбу ҳаво лайнерининг аввалги эгаси Таиланднинг Thai Airways авиакомпанияси бўлиб, 2010 йилда Тулузада ишлаб чиқарилган. Кейинроқ у «Aergo Capital» лизинг компанияси томонидан бошқарилган.
Йўловчи салони 358 ўринга эга бўлиб, эргономик ўриндиқлар, янгиланган ёритиш тизими ва узоқ масофали парвозлар учун қулайликлар билан жиҳозланган. Компания маълумотида, мазкур лайнер асосан Сеул, Гуанчжоу, Бангкок, Истанбул, Жидда ва Мадина каби юқори талабга эга йўналишларда парвоз қилади.
Centrum Air апрел ойида биринчи, июл ойида эса иккинчи Airbus A330 самолётларини паркига қўшган эди. Уларнинг ҳар иккаласи ҳам ирландиялик Aergo Capital лизингчиси орқали киритилган.
Ҳозирда хусусий авиакомпания паркида 12 та самолёт мавжуд: олтита Airbus A320, учта A321 ва учта A330−300. Флотнинг ўртача ёши 12 йилни ташкил этади.