Volkswagen концерни ўзининг машҳур Passat моделининг арзон муқобили — VW Sagitar 2026 моделини расман намойиш этди. Янги седан Хитойдаги бозор учун мўлжалланган бўлиб, арзон нархи, катта ҳажми ва замонавий дизайни билан эътибор қозонмоқда.
Sagitar модели техник жиҳатдан VW Jetta платформасига асосланган бўлса-да, ундан анча катта. Автомобилнинг умумий узунлиги 4812 мм, ғилдирак базаси — 2731 мм, кенглиги — 1813 мм, баландлиги эса 1479 мм ни ташкил этади. Бу кўрсаткичлар уни D-категорияли Passat билан бир қаторга қўяди.
Ҳозирча маълум бўлишича, янги Sagitar 1,5 литр ҳажмли бензинли двигател билан жиҳозланади. У 160 от кучига эга бўлиб, кўпинча иқтисодий ва ишончли мотор сифатида баҳоланади. Яқин келажакда бошқа вариантлар ҳам тақдим этилиши мумкинлиги билдирилди.
Автомобилнинг бошланғич нархи 16 минг доллардан бошланади. Ҳолбуки, аввалроқ унинг минимал комплектацияси 20 минг доллар бўлиши айтилган эди. Бу эса Sagitar’ни ўз синфи учун жуда рақобатбардош моделга айлантиради.
Volkswagen ушбу модел орқали Хитой ва бошқа ривожланаётган бозорларда катта бўшлиқни тўлдиришни мақсад қилган. Sagitar Passat каби ҳашаматли эмас, аммо амалиётга йўналтирилган, арзон ва визуал жиҳатдан замонавий транспорт воситаси сифатида қабул қилинмоқда.