7 сентябр куни «Россия сегодня» медиагруппаси ва Russia Today телеканали бош муҳаррири Маргарита Симонян Владимир Соловёвнинг «Вечер» дастурида сўзлаб, шифокорлар унга «қўрқинчли ва оғир» касаллик ташхисини қўйишганини маълум қилди. У бу ҳақда шахсан гапиришни маъқул кўрганини айтди ва қўли билан чап кўкрак қисмига ишора қилди. Симоняннинг сўзларидан операция мастэктомия бўлиши мумкинлиги англашилди.
45 ёшли Симонян аниқ қандай касалликка чалинганини очиқламади. Аммо The Moscow Times манбаларига кўра, у саратонга чалинган ва унинг соғлиғида жиддий муаммолар бор. Манба хабарига кўра, унинг Russia Today раҳбарлигини давом эттириш-эттирмаслиги масаласи кўриб чиқилаётгани, ишдан кетиш эҳтимоли мавжудлиги айтилмоқда.
Маргарита Симонян Россия ҳукумати молиялаштирадиган ва ташқи аудиторияга қаратилган асосий тарғибот каналларидан бири — RT телеканалини бошқаради. 2025 йилда RT учун давлат бюджети 31,1 млрд рублни ташкил қилган. ЕИ ва АҚШ унинг ўзи, ҳамда Россия сегодня, РИА Новости ва RT’га қарши санкциялар жорий қилган.
Унинг турмуш ўртоғи — режиссёр Тигран Кеосаян 2025 йил январидан бери комада. Симоняннинг сўзларига кўра, у клиник ўлимни бошидан кечирган ва тўққиз ойдан бери ҳеч қандай яхшиланиш кузатилмаган. Кеосаян бир неча филмлар, жумладан, «Қрим кўприги» пропаганда филми муаллифи. Шунингдек, Кремль тарғиботига оид кўрсатувлар бошловчиси сифатида танилган.