Россия иқтисодиётидаги кескин секинлашув фонида компанияларнинг 57 фоиз йил охиригача пасайишни кутаётганини маълум қилди. Бу ҳақда «Опора России» ташкилоти сентябр бошида ўтказган сўров натижаларига таянган ҳолда РБК хабар берди. Фақат 28 фоиз компаниялар иқтисодий ўсишга умид билдирган.
Сўров натижаларига кўра, компанияларнинг 90 фоизи ўтган йилда янги шерик ва етказиб берувчиларни излашга мажбур бўлган. Корхоналарнинг ярмидан кўпроғи (51 фоизи) эса иқтисодий оптималлаштириш мақсадида ходимларини қисқартирган. Бунга қарамай, 73 фоиз ташкилотларда ишчи кучи етишмайди. Бу етишмовчилик, айниқса, Украинадаги уруш бошлангандан сўнг кучайган.
Шунингдек, сўровда қатнашганларнинг 67 фоизи сўнгги уч йилда янги бозорларга чиқа олмаганини тан олган. Уруш ва санкциялар оқибатида йўқотилган бозорларни «дўстона» мамлакатлар билан қоплаш 62 фоиз компаниялар учун муваффақиятсиз кечган. Фақат 12 фоиз корхона янги бозорлардан қониқарли натижа олган.
Тадқиқотда иштирок этганларнинг аксари қурби кучли рубл, молиявий ресурслар етишмаслиги ва давлат томонидан кўрсатилаётган ёрдамнинг камлигидан шикоят қилган. Бундан ташқари, 64 фоиз компаниялар давлат органлари назоратининг кескин ошганини қайд этган.
«Яков и Партнёри» компанияси сўровига кўра, 2025 йилнинг биринчи ярмида бизнес вазияти ёмонлашганини қайд этганлар улуши 34 фоизга етди. Бу — уруш бошланганидан бери энг юқори кўрсаткич. Айниқса, тоғ-кон қазилма, кимё, нефт-газ ва транспорт соҳаларидаги корхоналар ҳолат ёмонлашганини билдирган.