Суриянинг собиқ президенти Башар Асад коллекциясидаги ноёб суперкарлар Дамашқда кимошди савдосига қўйилди. Бу ҳақда focus.ua маълум қилди.
Кимошди савдосига Суриянинг янги президенти Аҳмад аш-Шараа ташриф буюради. Автомобиллардан тушган барча маблағ Сурия тараққиёт жамғармасига ўтказилади.
Башар Асаднинг автомобиллари навбатма-навбат сотилади. Биринчи босқичда учта суперкар савдога қўйилади, уларнинг энг қиммати 3-4 миллион доллар турувчи Ferrari F50 ҳисобланади.
Жами 349 та Ferrari F50 ишлаб чиқарилган. Бу суперкар «Формула-1» двигатели асосида яратилган 4,7 литрли, 520 от кучига эга V12 двигател билан жиҳозланган. У 3,7 сонияда 100 км/соат тезликка эришади ва максимал тезлиги 325 км/соатга етади.
Mercedes SL65 AMG Black Series купесининг нархи 500 минг доллар атрофида баҳоланмоқда. 670 от кучига эга V12 қўш турбинали бу суперкардан атиги 300 та ишлаб чиқарилган. Автомобил 3,8 сонияда 100 км/соат тезликка эришади ва максимал тезлиги 320 км/соатни ташкил этади.
Шунингдек, 525 от кучига эга 5,2 литрли Lamborghini V10 двигателига эга биринчи авлод Audi R8 суперкари ҳам савдога қўйилади.
2025 йил 8 сентябр куни Дамашқ шаҳридаги тарихий қалъада Суриянинг янги раҳбарияти томонидан миллий ривожланиш фонди тақдим этилди. Президент Аҳмад ал-Шара тадбирни очаркан, бу фонд мамлакатда Асад режими ағдарилгандан кейинги тикланиш жараёнининг рамзига айланиши лозимлигини таъкидлади.
Тадбир бутун мамлакат бўйлаб тўғридан-тўғри эфирда намойиш этилди. Президент ал-Шараа ўз нутқида Асад режими иқтисодиётни вайрон қилгани, халқнинг мол-мулки талон қилингани ва миллионлаб инсонлар қочқинга айланганини қайд этди. Унинг сўзларига кўра, янги фонднинг асосий мақсади аҳолини ўз жойларига қайтариш ва қишлоқ хўжалигини тиклашдан иборат.