АҚШ президенти Доналд Трамп 7 сентябр, якшанба куни Россияга нисбатан санкцияларнинг «иккинчи босқичи»ни ишга туширишга тайёр эканини билдирди. Бу ҳақда у Вашингтонда журналистлар билан суҳбатда маълум қилгани ҳақида Reuters агентлиги хабар берди.
У қандай чоралар кўрилиши ва қарор қабул қилинган ёки йўқлиги ҳақида аниқ маълумот бермади.
Қизиғи шундаки, Доналд Трамп АҚШ президенти бўлганидан сўнг Россияга қарши бирор бир санкция қўлламаган. Ер юзидаги барча давлатларга тарифлар оширилганида ҳам Россия бундан мустасно бўлган.
Боз устига, яқиндагина Путинни АҚШга таклиф қилиб юзма-юз учрашган Трамп, яқин кунларда яна Россия президенти билан мулоқот қилиш нияти борлигини маълум қилди.
Бунгача, душанба ёки сешанба куни бир қатор европалик етакчилар АҚШга ташриф буюриб, Украинадаги урушни тўхтатиш бўйича музокаралар ўтказишади.
Оқ уй маслаҳатчиси Кевин Ҳассетт CBS News телеканалига берган интервюсида яқин кунларда санкцияларнинг даражалари ва амалга киритилиш саналари фаол муҳокама қилинишини таъкидлади. Бу АҚШ ва Европа Иттифоқи ўртасидаги узвий ҳамкорликнинг давоми бўлади.
АҚШ молия вазири Скотт Бессент ҳам ўз чиқишида Россия иқтисодиётига босимни кучайтириш мақсадида қўшимча чоралар кўрилиши мумкинлигини билдирди. Унинг таъкидлашича, АҚШ ва ЕИ Россия нефтини харид қилаётган давлатларга нисбатан иккинчи даражали божлар жорий этиш масаласини муҳокама қилмоқда.
Бессентга кўра, бу чоралар Россия иқтисодиётини «жар ёқасига» олиб боришга хизмат қилади. У ҳамкор давлатларни биргаликда ҳаракат қилишга чақирди. «Биз босимни кучайтиришга тайёрмиз, фақат Европадаги шерикларимиз ҳам бирга қадам ташлаши керак», — деди у NBC телеканалига.