The Washington Post нашрида эълон қилинган таҳлилий мақолага кўра, Украина янги стратегия сифатида Россиянинг қуролли кучларини қуруқлик ва ҳавода фалаж қилишни мақсад қилмоқда. Муаллифнинг фикрича, Киев бу йўл билан денгиздаги муваффақиятини қуруқликда ҳам такрорламоқчи.
Мақолада айтилишича, бу режалар АҚШ президенти Доналд Трампнинг тинчлик ўрнатиш уринишлари муваффақиятсиз бўлганини кўрсатади. Муаллифнинг таъкидлашича, Трамп «бўш таҳдидлар» билан чиқиш қилган ва «аниқ бўлмаган муддатлар» белгилаган, натижада уруш тўхтамаган. Ҳарбий таҳлилчилар фикрига таянган ҳолда, уруш ҳеч бир томон учун ҳал қилувчи босқичга кирмагани қайд этилади.
Украинанинг собиқ мудофаа вазири Андрий Загороднюкнинг сўзларига кўра, мамлакат энди Россиянинг ҳарбий ютуқларига йўл қўймаслик стратегиясини қабул қилган. Унинг таъкидлашича, Украина ҳужумларга жавоб беришдан ташқари, Россиянинг тактик режаларини илгаридан йўққа чиқаришга интилади. «Россия курашни давом эттириши мумкин, аммо агар биз ушбу моделни амалга ошира олсак, улар ғалаба қилолмайди», — деган Загороднюк.
Россия генерали Валерий Герасимовнинг сўнгги чиқиши эсга олинган: у ҳали ҳам ҳужумларни давом эттириш ниятида эканини айтган. Аммо мақолада таъкидланишича, Россия ёзги кампания давомида «фаол ютуқ» қайд этолмаган ва АҚШнинг баҳолашича, Россиянинг йўқотишлари ўлган ва яраланганлар ҳисобида миллиондан ошган.
«Айрим жангларда Россия ҳар бир украиналик қурбон учун 12 нафардан ортиқ йўқотиш берган», — деб ёзади мақола муаллифи. Унинг қайд этишича, Украина Россияни ҳарбий мақсадларига етиб бормасликка мажбур қилиш ва доимий уруш шароитида яшашни ўрганишга интилаяпти. Бунинг энг муҳим қисми эса самарали ҳаво ҳимоя тизими қуришдир.
Муаллиф Украина стратегиясини «стратегик пессимизм» деб атайди. «Кавалерия келмаяпти. Трамп урушни бир кун ёки бир йил ичида тўхтатиш ниятида эмас. Европа эса бу бўшлиқни тўлдиришга ҳаракат қиляпти, лекин у тинчлик шартномаси имзоланмагунича хавфсизлик кафолатларини бера олмайди», — дейилади мақолада.