Украина президенти Володимир Зеленский ўзининг анъанавий кечки видеомурожаатида Россия томонидан сўнгги кунларда кучайган ҳаводан ҳужумларни кескин қоралаб, бу урушни кенгайтиришга қаратилган навбатдаги қадам эканини таъкидлади.
Унинг сўзларига кўра, айниқса Киев, Суми, Кременчук, Одесса, Днипро, Запорижжя ва Кривий Риг шаҳарлари Россиянинг 800 дан зиёд бирваракайига учирилган дронлари ва ракеталарига нишон бўлган. Гарчи дронларнинг бир қисми уриб туширилгани иддао қилинаётган бўлса-да, нишонга бориб етганлари ҳам бор.
Киевда ҳалок бўлганлар қидирилмоқда, чунки кўпинча қурбонлар вайроналар остида қолиб кетган бўлиши мумкин. Шаҳардаги бир неча бинолар, жумладан Украина Ҳукумат уйи ҳам зарарланган. Зеленский маълум қилишича, бутун мамлакат бўйлаб 40 дан зиёд одам жароҳатланган, шулардан 20 нафари Киевда.
Президент Зеленский ҳалок бўлганларнинг оила аъзоларига ҳамдардлик билдирди ва айтилишича, фақат Киевнинг ўзида ҳаводан ҳимоя сиренаси 7,5 соат давом этган.
Зеленский бу ҳужумларга халқаро ҳамжамиятдан қай даражада кескин ва аниқ реакция келиши жуда муҳим эканини урғулади. Унинг фикрича, Путин дунё агрессияни қабул қиладими ёки унга қарши курашадими — шуни синамоқда. Шунинг учун санкциялар, савдо чекловлари ва Россияга боғлиқ шахсларга қарши аниқ чоралар муҳим, дейди Зеленский.
Шунингдек, у Россиядаги бензин танқислиги ва иқтисодий муаммоларни Кремлнинг тинчлик музокараларидан бош тортишига нисбатан мантиқий жавоб деб атади.