АҚШ президентининг Яқин Шарқ бўйича махсус элчиси Стивен Уиткофф ва Америка раҳбарининг куёви Жаред Кушнер Исроилнинг стратегик режалаштириш вазири Рон Дермер билан учрашиб, Вашингтоннинг Ғазодаги можарони ҳал этиш бўйича янги режасини муҳокама қилди. Бу ҳақда Axios портали хабар берди.
Қайд этилишича, кеча, 9 сентябрдаги музокаралардан олдин Уиткофф ва Доналд Трампнинг биринчи президентлик даврида катта маслаҳатчи лавозимида ишлаган Кушнер 7 сентябр куни АҚШ теннис бўйича очиқ чемпионатининг финал ўйинида Америка раҳбари билан учрашган. Сўнгги ҳафталарда Кушнер Ғазодаги можарони ҳал қилиш бўйича таклифлар ишлаб чиқишда фаолроқ иштирок эта бошлаган. Трамп унинг жанглар тугаганидан сўнг Ғазони тиклаш бўйича ғояларини юқори баҳолаган.
Оқ уйнинг Исроил ва ҲАМАС ҳаракатига йўллаган янги тинчлик таклифи барча исроиллик асирларни озод этиш ва ҳалок бўлганларнинг жасадларини дарҳол ўт очишни тўхтатиш эвазига топширишни назарда тутади. Шундан сўнг томонлар якуний келишув бўйича музокараларни бошлайдилар.