Дастурий таъминот ишлаб чиқарувчи Oracle компаниясининг ҳаммуассиси Ларри Эллисон Bloomberg миллиардерлари рейтингида Tesla ва SpaceX асосчиси Илон Маскдан ўзиб, биринчи ўринга кўтарил. Бу ҳақда агентлик хабар бермоқда.
Эллисоннинг мол-мулки 393 миллиард долларга етган бўлса, Маскнинг бойлиги 385 миллиард долларни ташкил этган. Эллисон бундай кескин юқорилашга эришишининг сабаби, унинг капитали бир кунда 101 миллиард долларга ошгани бўлган — бу Bloomberg рейтинги тарихидаги энг катта ўсиш ҳисобланади.
Маълумот учун, Маск деярли бир йил давомида рейтингида биринчи ўринни эгаллаб турди. У илк бор 2021 йилда бу мавқега эришган, аммо кейинчалик Amazon асосчиси Жефф Безос ва LVMH асосчиси Бернар Арнодан ортда қолган. Ҳозирда улар мос равишда тўртинчи ва саккизинчи ўринларни эгаллаб турибди.
Июл ойидан бошлаб Эллисон Bloomberg рейтингида Meta раҳбари Марк Цукербергни ортда қолдириб, иккинчи ўринни эгаллаб келаётган эди.
Шунингдек Forbes Эллисоннинг бойлиги ўсганини таъкидлади (тахминан 102 миллиард доллар ёки умумий бойлигининг деярли 35 фоизи), унинг умумий капитали 395 миллиард долларга баҳоланмоқда. Бироқ Маск журнал рейтингида ҳамон 437 миллиард доллар бойлиги билан пешқадамлик қилмоқда.
Эллисоннинг бойлиги 2026-молиявий йилнинг биринчи чораги бўйича ҳисоботи эълон қилинганидан сўнг Oracle акцияларининг кескин ўсиши туфайли кўпайди (АҚШда молиявий йил 1 октябрдан 30 сентябргача давом этади). Bloomberg маълумотига кўра, акциялар жорий йил давомида 45 фоизга кўтарилиб, 9 сентябрь куни тарихий юқори чўққига эришди ва чоршанба куни яна 41 фоизга ошди.
Агентликнинг тушунтиришича, сунъий интеллект ривожланиши фонида булутли инфратузилмага киритилган сармоялар Oracle’нинг гуллаб-яшнашига имкон берган. Компаниянинг сўнгги ҳисоботига кўра, булутли технологиялардан олинган даромад 28 фоизга ўсиб, 7,2 миллиард долларга, булутли инфратузилмадан олинган даромад эса 55 фоизга кўтарилиб, 3,3 миллиард долларга етган. Ораcле’нинг мажбуриятлар портфели 359 фоизга ошиб, 455 миллиард долларга етди. Бунга йирик шартномалар, жумладан, ChatGPT ишлаб чиқарувчиси OpenAI билан 4,5 ГВт қувватга эга маълумотларни қайта ишлаш марказларини яратиш бўйича тузилган келишув сабаб бўлди.
Шунингдек, компания АҚШ президенти Доналд Трамп томонидан январда эълон қилинган Stargate сунъий интеллект учун инфратузилма яратиш лойиҳасида ҳам иштирок этмоқда. Эллисон республикачи номзодни қўллаб-қувватламоқда.