АҚШ президенти Доналд Трамп ҳуқуқбон ва сиёсий фаол Чарли Киркнинг ўлдирилиши ортидан барча айбдорларни жавобгарликка тортишини ваъда берди. Унинг сўзларига кўра, ўз маъмурияти билан биргаликда бу зўравонликка алоқадор ҳар қандай шахс топилиб, жазога тортилади.
«Маъмуриятим ушбу ва бошқа сиёсий сабабли зўравонлик ҳаракатларида қатнашган ҳар бир шахсни топади ва жавобгарликка тортади », — деди Трамп Truth Social платформасидаги видео мурожаатида.
Чарли Киркга Юта водийси университетидаги дебат пайтида ўқ узилган. Интернетда тарқалган видеоларда, ўқ унинг бўйнига теккани кўринади. У шошилинч равишда шифохонага етказилган. Кейинчалик унинг вафоти ҳақида Трампнинг ўзи маълум қилган.
Президент шунингдек, мамлакат бўйлаб Америка байроқларини пастга туширишни буюрди. Қатл Америка сиёсий доираларида қаттиқ қайғу ва ғазаб уйғотди. Хусусан, собиқ президентлар Жо Байден ва Барак Обама, шунингдек, собиқ президентликка номзод Камала Ҳаррис ҳам ўз фикрларини билдирди.
Жо Байден қотилликни қоралар экан, бу каби зўравонликларга АҚШда ўрин йўқлигини таъкидлади. «Бу дарҳол тўхташи керак», — деди у. Барак Обама эса Киркнинг оиласига таъзия билдириб, бу жиноятни демократияга зид ҳаракат деб атади. Камала Ҳаррис ҳам ўз чиқишида, «сиёсий зўравонлик ҳеч қачон қабул қилиб бўлмайдиган ҳолат» эканини билдирди.