НАТО 12 сентябр куни Европа шарқий қанотини мустаҳкамлашга қаратилган янги операция — «Шарқий қўриқчи» миссиясини бошлаганини эълон қилди. Бунга Россия дронларининг Полша ҳаво ҳудудига ноқонуний кириб келиши сабаб бўлган. Алянс бош котиби Марк Рютте Reuters агентлигига сўзларида таъкидлашича, НАТО ўз ҳудудини ҳимоя қилишда қатъий ва тайёр эканини бутун дунёга кўрсатмоқчи.
Айни пайтда миссияга Дания, Франция, Буюк Британия ва Германия қўшилган. НАТО баёнотига кўра, Дания иккита F-16 ва бир фрегат, Франция учта Rafale, Германия эса тўрта Eurofighter учоқларини ажратган. Рютте Россиянинг ҳаракатларини «носоғлом ва тоқат қилиб бўлмайдиган» деб атади.
НАТОнинг Европа бўйича қўшма кучлар бош қўмондони Алексус Гринкевич маълум қилишича, операция бутун шарқий қанот — Болтиқбўйи давлатларидан то Руминия ва Болгариягача бўлган ҳудудни қамраб олади. Унинг сўзларига кўра, «Шарқий қўриқчи» нафақат доимий кучларни жойлаштириш, балки таҳдидларга тез жавоб бериш имконини берадиган адаптив ёндашувни кўзда тутади.
«Биз позициямизни доимий равишда янгилаб борамиз. Бу нафақат душманни ҳужумда устунликдан маҳрум этиш, балки ҳар қандай хавфга жадал жавоб бериш учун ҳам зарур», — деди Гринкевич.
Шу билан бирга, Politico нашрининг хабар беришича, Европа етакчилари АҚШ президенти Доналд Трампни Россия урушни тўхтатиш ниятида эмаслигига ишонтиришга муваффақ бўлган. Энди Вашингтон билан янги стратегик чораларни амалга ошириш усуллари келишиб олиниши керак.
Ўтган ҳафтада ЕИ ва АҚШ расмийлари янги босим чораларини муҳокама қилган: жумладан, Россия нефт ва газ таъминотини қисқартириш ҳамда молиявий чекловларни кучайтириш масалалари. Бу бўйича техник гуруҳ Вашингтонга етиб борган. Politico манбаларига кўра, асосий тамойиллар бўйича келишувга эришилган.