Қирғизистоннинг собиқ президенти Алмазбек Атамбоевнинг рафиқаси Раиса Атамбоева мамлакат фуқаролари ва президент Садир Жапаровга очиқ мурожаат билан чиқди. У ўз баёнотида оиласи атрофидаги вазиятни адолатсиз деб ҳисоблагани учун илк бор жамоатчиликка мурожаат қилишга мажбур бўлганини таъкидлаган.
«Азиз қирғизистонликлар! Бугун, афсуски, биринчи марта сизларга мурожаат қилишга мажбурман. Мамлакатимизда турли фуқароларнинг рафиқалари уйларини сақлаб қолиш илтимоси билан ҳокимиятга мурожаат қилишлари одатий ҳолга айланиб қолди. Мен буюк қирғиз халқининг келини ва ўз ватанимнинг ҳақиқий фидойиси сифатида ўзимни камситиб, бошқалар сингари мен ва фарзандларимга уй қолдиришларини сўрашга ҳақли эмасман. Мени таъзим қилишга мажбурлашга уринишларининг ўзиёқ бутун улуғ қирғиз миллатимизни шарманда қилади!», — дея ёзган у Facebook’даги саҳифасида.
Атамбоева етти йил олдинги воқеаларни эслатиб ўтди, ўшанда унинг турмуш ўртоғига қарши шафқатсиз кампания бошланган эди. Унинг айтишича, бундай вазиятда улар Ўзбекистон биринчи хоними Зироат Мирзиёева ёрдами билан Ўзбекистонда жон сақлаган.
«Бундан 7 йил муқаддам, турмуш ўртоғимга қарши шафқатсиз кампания бошланганида, биз Ўзбекистон биринчи хонимининг таклифига биноан бир неча кун давомида шу гўзал мамлакатда бўлдик. Баъзилар менга қўнғироқ қилиб, фарзандларим билан юртга қайтмаслигимни талаб қилишди. Ўшанда ҳам, ҳозир ҳам айтаман: қирғизлар хони Манас ўлдирилгандан сўнг, унинг оиласи қочиб Ўзбекистонда яшаган, ва биз азоб чекишимиз, ҳаттоки ўлишимиз керак бўлса ҳам, бундай тарихнинг такрорланишига ҳеч қачон йўл қўймаймиз», — дея ёзади Атамбоева.
Мурожаатномасида собиқ биринчи хоним президент Садир Жапаровга алоҳида сўз қотган. Собиқ президенти Қурманбек Бакиевни ҳам эслаб ўтган.
«Президент Садир Жапаровга мурожаат қилмоқчиман! Ёшингиз мендан кичик бўлса-да, мақомингизга кўра сизга ҳурмат билан мурожаат қилишни лозим кўрдим. Эҳтимол, турмуш ўртоғим Бакиевни Дубайда оқлашга розилик бермаганидан кейин, сизда унга нисбатан енгиб бўлмас салбий туйғулар пайдо бўлгандир. Аммо шуни тушунишингиз керакки, у сизга қарши чиқмади, балки бу масала 5-6 нафар собиқ президент ва ҳукумат аъзолари томонидан ҳал қилинадиган эмас, аксинча бутун Қирғизистон халқи, айниқса, ҳалок бўлганлар ва жабрланганларнинг оилалари томонидан ҳал қилиниши лозим бўлган масала эканлигини таъкидлади», — дейилади мурожаатда.
У яна уч йил олдин бўлиб ўтган, ота қишлоғидаги ягона уйларининг тақдири муҳокама қилинган учрашувни эслатиб ўтди.
«Уч йил аввал сиз билан ота қишлоғимиздаги ягона уйимиз ҳақида ўтказган учрашувимизда, сизнинг ташаббусингиз билан, мен турмуш ўртоғим билан ўша уйда яшашимиз тўғрисида келишиб олган эдик. Давлат қароргоҳидаги ягона уй — давлат маблағи эмас, балки шахсий маблағларимиз ҳисобига қурилган эди, уни биздан тортиб олишди», — дея ёзади у.
Раиса Атамбаева, оиласи босимлардан қатъи назар, ўз шаъни ва қадр-қимматини ҳимоя қилишга тайёр эканлигини таъкидлади.
Аммо, агар бизда ор-номус ва қадр-қиммат сақланиб қолгани сизни безовта қилаётган бўлса ва шу йўл билан бизни камситмоқчи бўлсангиз, ҳозир ҳаммаси ўз ихтиёрингизда. Лекин шуни унутмангки, Аллоҳ барчамизни кузатиб турибди. Буюк қирғиз халқининг келини сифатида, турмуш ўртоғим йўқлигида ўз ҳуқуқларимни ва ягона оилавий ўчоғимизни ҳимоя қилишда давом этаман», — дея таъкидлади Атамбаева.
Мурожаат якунида собиқ биринчи хоним Қирғизистонда тинчлик ва бирдамликни сақлаш ўзининг асосий мақсади бўлиб қолишини айтди.
«Мен ҳеч қачон буларнинг барчасини овоз чиқариб айтишни хоҳламагандим ва ҳали айтадиган кўп гапим бор. Бироқ энг аввало халқимиз ва мамлакатимизнинг тинчлиги ҳамда бирлигини сақлаш ҳақида ўйлашимиз керак. Мен сизни айнан шунга даъват этаман», — дея якунлади у.
Қўй-Тошдаги уйдан қувилиш
Аввалроқ, Алмазбек Атамбоев оила аъзолари Атамбоевлар оиласига тегишли бўлган Қўй-Тошдаги уйидан ҳайдаб чиқарилгани хабар қилинган эди. «Мени, онамни ва оила аъзоларимни Қўй-Тошдаги уйимиздан, ота-боболаримиз юртидан, қариндошларимиз дафн этилган жойдан атиги 100 метр наридаги уйимиздан ноқонуний равишда чиқариб, бизни бошпанасиз қолдирмоқчи. Суд ижрочилари келишди», — дея ёзганди Алмазбек Атамбоевнинг ўғли Қодир Атамбоев Facebook’даги саҳифасида.
Унга кўра, оиласи билан бирга Олий суд ва Конституциявий палатага мурожаат қилишни режалаштирган. Ҳукумат Атамбоевга тегишли Социал-демократлар партияси қароргоҳи ва 2010 йил 7 апрел инқилоби бошланган «»Media Forum» мусодара қилмоқчи.
«Бу мутлақ ўзбошимчаликдир. Биз Олий судга ҳам, Конституциявий палатага ҳам мурожаат қиламиз. Ҳатто шаҳар суди жараёни ҳам тугалланмаган. Шундай бўлса-да, суд ижрочилари юқоридан берилган кўрсатмага асосан ўз ноқонуний ҳаракатларини бошлашмоқда. Мени шу ерда ўлдиринглар. Чет элга чиқишимга, ҳатто даволанаётган отам билан учрашишимга ҳам рухсат бермаяпсизлар. Мамлакат ичида эса уйимни тортиб оляпсизлар. Наҳотки мен Айдар Акаев, Максим Бакиев, Рустам Жапаров ва Таймурас Ташиевдан ҳам ёмонроқ бўлсам?!», — дея ёзган Қодир Атамбоев.
Атамбоев иши ҳақида
Бишкекнинг Первомайск туман суди Алмазбек Атамбоевни сиртдан 11 йил-у 6 ойга озодликдан маҳрум этишга ҳукм қилган эди. Собиқ давлат раҳбари битта иш юритувига бирлаштирилган учта жиноий иш бўйича айбдор деб топилган. Атамбоев ноқонуний бойлик орттириш, ер участкаларини ғайриқонуний олиш ва 2019 йилда Қўй-Тош қишлоғида содир бўлган оммавий тартибсизликларни уюштиришда айбланган эди.
Бундан ташқари, апрел ойи ўрталарида суд Қирғизистон собиқ раҳбарини 2013 йил апрелида жиноятчи авторитет Азиз Батукаевни қамоқдан ноқонуний равишда муддатидан олдин озод қилишга алоқадор деб топди. Батукаев 2006 йилда оммавий тартибсизликлар уюштиргани ва ноқонуний қурол сақлаш учун 16 йилга қамалган эди. Муддатидан олдин озод этилгач, Батукаев зудлик билан Грознийга жўнаб кетди.
Атамбоев 2011-2017 йилларда Қирғизистонга раҳбарлик қилган. У 2019 йил 8 август куни Чуй вилоятидаги Қўй-Тош қишлоғидаги қароргоҳида бир суткага яқин давом этган махсус операция жараёнида қўлга олинган. Ўзига қўйилган барча айбловларни бир неча бор инкор этган собиқ давлат раҳбарининг тарафдорлари қаршилик кўрсатган, натижада операция пайтида махсус кучларнинг бир ходими ҳалок бўлган. Қарама-қаршилик даврида 100 дан ортиқ киши, шу жумладан милиция ходимлари ҳам, тиббий ёрдам сўраб мурожаат қилишган.
2020 йил ёзида Атамбоев 11 йил-у 2 ойга озодликдан маҳрум этилган эди. 3,5 йилдан сўнг суд қарори билан у озодликка чиқарилиб, мамлакатни тарк этган.