АҚШ президенти Доналд Трамп Россияга қарши янги санкциялар қўллаш масаласида НАТО давлатларига мурожаат қилди. Унинг таъкидлашича, агар иттифоқдошлар Россия нефтини сотиб олишни тўхтатса, Вашингтон Москвага нисбатан жиддий иқтисодий чоралар кўради.
«Мен Россияга қарши қаттиқ санкциялар жорий этишга тайёрман. Аммо бунда НАТОнинг барча аъзолари биргаликда ҳаракат қилиши ва Россиядан нефт харид қилишни бас қилиши керак», — деди у Truth Social саҳифасидаги баёнотида.
Трамп Европа иттифоқчилари томонидан нефть импорти давом эттирилаётганини «ҳайратланарли ва АҚШнинг музокаралардаги позициясини заифлаштирувчи омил», деб атади. У ўз баёнотида: «Мен ҳаракатга тайёрман. Фақат қачон эканини айтинг», — дея чақириқ билан чиқди.
Президент шунингдек, НАТО давлатларига Россия иқтисодига билвосита таъсир кўрсатиш учун Хитой товарларига 50–100 фоизлик божлар жорий этишни таклиф қилди. Унинг сўзларига кўра, Россия Хитойга қарам ва бундай босим урушни тугатиши мумкин. Божларнинг бекор қилиниши эса фақат уруш тугагандан кейин амалга оширилиши мумкин.
«Агар НАТО мен айтгандай иш тутса, уруш тезда тугайди ва минглаб инсонлар ҳаёти сақланиб қолади. Акс ҳолда, сиз менинг вақтимни ва АҚШнинг маблағлари ҳамда саъй-ҳаракатларини беҳудага сарфлаяпсиз», — деди Трамп.
У шунингдек, Россия президенти Владимир Путиннинг урушни тўхтатмаслиги ва дронларнинг Польша ҳудудига кириб боришига бўлган норозилигини билдирди. Агар вазият ўзгармаса, АҚШ Россиянинг банк тизими ва нефт саноатига қарши янги санкциялар жорий этишини маълум қилди.
Қайд этиб ўтиш керак, НАТОга аъзо давлатлардан Венгрия ва Словакия Россиядан нефт харид қилишда давом этмоқда ва ундан воз кечмоқчи эмас. Қолаверса, бу мамлакатлар раҳбарлари Виктор Орбан ва Роберт Фицо РФ президенти Владимир Путин билан яқин алоқаларни сақлаб қолишган.