Солиқ қўмитаси хабарига кўра, январ-июл ойларида соҳада фаолият юритган 20 126 та юридик шахс жами 963,3 млрд сўм солиқ тўлаган. Улар умумий ҳисобда 10,8 трлн сўмлик товар айланмасига эга бўлган, солиқ имтиёзлари эса 108 млрд сўмни ташкил этган.
Энг йирик 20 та солиқ тўловчи компаниянинг ҳиссаси умумий сумманинг бешдан бирини ташкил этган. Улар жами 184,2 млрд сўмлик солиқ тўлаб, бозорда етакчи ўринни эгаллади.
Биринчи ўринда халқаро KFC тармоғининг Ўзбекистондаги франшизаси – International Foodchain компанияси жойлашиб, 55,7 млрд сўм солиқ тўлаган. Ундан кейинги ўринда Evos брендини бошқарадиган Mak Food Servis (37,7 млрд сўм) келган. Кучли учликни эса Oqtepa Lavash оператори — Oqtepa Food Service 21,4 млрд сўм билан якунлаган.
ТОП-20 рўйхатидан Ketring (19,3 млрд сўм), Feed Up (4,9 млрд сўм), Savdo МЧЖ (4,6 млрд сўм), Chef Catering (3,8 млрд сўм), French Pastry (3,5 млрд сўм), MaxWay Food (3,0 млрд сўм), Bellissimo Pizza International (2,8 млрд сўм) ва Dodo Pizza Tashkent (2,2 млрд сўм) каби машҳур брендлар ҳам ўрин олди.
Солиқ тушумларида энг катта улуш қўшилган қиймат солиғи (78,2 млрд сўм) ва жисмоний шахслар даромад солиғи (49,6 млрд сўм) ҳиссасига тўғри келди.