Financial Times таҳририяти Luxembourg Income Study нодавлат ташкилоти тадқиқотини таҳлил қилар экан, Францияда пенсиядаги фуқаролар ўртача ҳисобда ишлаётганлардан кўпроқ даромад қилаётган ягона мамлакат эканини маълум қилди.
Ҳисоб-китобларга кўра, француз пенсионерлари ишлаётган ёшларга нисбатан тахминан 1 фоиз кўпроқ даромад олади. Италияда эса бу фарқ 4–5 фоизни ташкил этади. Германия, АҚШ, Канада ва Норвегияда нафақа миқдори иш ҳақининг 85–90 фоизи даражасида. Британия, Швеция, Дания ва Нидерландияда ишлаётганларнинг даромади нафақахўрларникидан тахминан чоракка юқори.
DW медиа агентлиги эса август ойида Германияда ишсизларнинг даромади ишлаётганларникидан фақат бир неча юз евро камлигини ёзган, немислардан эса «яшаш учун кўпроқ меҳнат қилиш»ни сўраган эди.
Францияда пенсионерлар сони йил сайин ортиб бормоқда — 2023 йилда уларнинг сони 17,2 миллион нафарга етган. Бу 2022 йилга нисбатан 1,3 фоиз кўп. Аммо 2015 йилдан бери ўсиш суръати секинлашмоқда.
Маълумотларга кўра, Францияда нафақаларнинг ўртача миқдори — солиқлардан олдин 1666 евро, тоза ҳисобда эса 1541 евро. Бироқ 2017–2023 йилларда ушбу миқдор реал (инфляция ҳисобга олинган) кўринишда камайган, чунки пенсия индексацияси инфляциядан ортда қолган.