Намангандаги «Навбаҳор» футбол мактаби уч йилга Нидерландиянинг машҳур «Аякс» академияси бошқарувига бериш бўйича келишувга эришилди. Бу ҳақда президент Шавкат Мирзиёев бугун, 15 сентябр куни бўлиб ўтаётган йиғилишда маълум қилди.
«Наманганга келиб, футбол ҳақида гапирмасак бўлмайди. Наманганлик ёшлар учун футбол шунчаки ўйин эмас, бу – ҳаёт тарзи. Ҳар бир бола маҳаллада тўп тепиб катта бўлади. «Навбаҳор»нинг ҳар бир ўйини – шаҳар учун катта байрам», — деди давлат раҳбари.
Таъкидланишича, яқинда «Навбаҳор» футбол мактабини уч йил муддатга Нидерландиянинг машҳур “Аякс” футбол академияси бошқарувига бериш бўйича келишувга эришилган. Ушбу академиянинг 11 нафар мураббий, скаут ва методистлари Наманганга олиб келинади.
Президент келажакда бу академияда дунёнинг «топ» клубларида ўйнайдиган, жаҳон чемпионатларида ўз маҳоратини намоён қиладиган кўплаб футболчилар етишиб чиқишига ишонч билдирди.