АҚШнинг собиқ президенти Жо Байден президентликдан кейин пуллик маърузалар ва тижорат лойиҳалари орқали даромад топишда қийинчиликларга дуч келаётгани маълум бўлди. Бу ҳақда «The Wall Street Journal» хабар қилди.
Нашрга кўра, Байденнинг нуфузли компаниялар ва ташкилотлардан таклифлар олиши унинг ёши, Демократик партия ичидаги обрўси пасайгани ва айрим корпорацияларнинг президент Доналд Трамп ғазабидан қўрқиши сабаб чекланмоқда.
Жо Байденнинг сўнгги танқидчиларидан бири АҚШнинг собиқ вице-президенти Камала Харрис бўлди. У ўзининг «107 кун» номли хотираларида демократларни Байденнинг яна ўз номзодини кўрсатишига йўл қўйгани учун бепарволикда айблайди. «Орқага назар ташлаганимда, бу ақлсизлик эди деб ўйлайман. Таваккалчилик жуда юқори эди»,- деб таъкидлайганди Харрис.
The Wall Street Journal газетаси ёзишича, Байденнинг ўтмишдошлари фойдаланган мустаҳкам молиявий пойдевор ва зич пуллик нутқлар жадвали йўқ. Собиқ президент ҳар бир маъруза учун 300 мингдан 500 минг долларгача олиши мумкин эди.
Собиқ президентнинг молиявий ҳолати ҳам қийин кечаётгани айтилмоқда. У президентликни тарк этганидан кўп ўтмай 800 минг доллар қарзи борлигини тан олган. Бу қарзнинг катта қисми Делавер штатида 2,7 миллион долларлик уй харид қилиш учун олинган кредит билан боғлиқ. Шунингдек, 2025 йилда кўчмас мулк солиғи 20 фоизга ошиши Байденлар оиласи юкини янада оғирлаштирган.
Бундан ташқари, катта харажатлар Байденнинг ўғли Хантернинг суд жараёнлари, қизи Эшлийнинг ажралиш жараёни ва набираларини қўллаб-қувватлаш билан боғлиқ.
Собиқ президентнинг асосий даромад манбаси — Hachette Book Group билан тузилган шартнома ҳисобланади. Ушбу нашриёт Байденнинг келгуси хотираларини чоп этиш ҳуқуқи учун 10 миллион доллар тўлаган.