Илон Маск Tesla акцияларига 1 миллиард доллар сарфлаб, компанияни яна бош маррага қайтариш ниятида эканини амалда кўрсатди. Бу ҳаракат Tesla акцияларини бир кунда 6 фоизга оширди.
Tesla асосчиси Илон Маск охирги марта 2020 йилда бозордан акция харид қилган эди. Жорий харид — 2,57 миллион акция учун умумий 1 миллиард доллар атрофидаги тўлов — компаниянинг кейинги режалари учун муҳим сигнал сифатида қабул қилинди. Маскнинг айтишича, у акцияларни 372,37 доллардан 396,54 долларгача бўлган нархларда олган.
Бу ҳаракат Tesla учун ҳал қилувчи паллага тўғри келмоқда. Компания сунъий интеллект ва робототехника сингари янги йўналишларга жиддий кириб бормоқда. Бироқ, бир вақтнинг ўзида электромобиллар савдоси секинлашмоқда, рақобат ва ишлаб чиқариш харажатлари эса ўсмоқда.
Маск ушбу харид орқали нафақат бозорга ишонч уйғотди, балки ўзининг Tesla устидан катта назоратга эга бўлиш истагини ҳам яна бир бор аниқ кўрсатди. Яқинда кузатув кенгаши унинг талабларини инобатга олган ҳолда 1 трлн долларлик компенсация режасини таклиф этди. Маск эса аввалроқ, агар овоз бериш ҳуқуқи 25 фоизгача етмаса, AI ва робот лойиҳаларини Tesla’дан ташқарида амалга оширишини маълум қилган эди.
Hargreaves Lansdown таҳлилчиси Мэтт Бритцман буни «Tesla–Маск ривожи яна ўз йўлига тушганининг энг кучли сигнали» сифатида баҳолади. Унга кўра, Маскнинг бозорга қайтиши инвесторлар учун аниқ ишонч манбаи бўлади. Tesla акциялари йил бошидан бери йўқотган қийматини қоплашга ҳаракат қилмоқда.