Олий Мажлис Қонунчилик палатаси мажлисида болаларни зўравонликдан ҳимоя қилиш тизимини такомиллаштиришга қаратилган қонун лойиҳаси иккинчи ўқишда қабул қилинди.
Лойиҳага кўра, Жиноят ва Маъмурий жавобгарлик кодексларига бир қатор ўзгартишлар киритилиши кўзда тутилган. Жумладан, болалар акс этган порнографик маҳсулотларни сақлаш учун жавобгарлик белгиланади, шунингдек, интернет орқали ёки бошқа усулларда болаларга нисбатан жинсий зўравонлик учун жазо кучайтирилади.
Қонунга киритилаётган янгиликлардан яна бири — бола иштирокидаги тергов жараёнлари тартибини аниқ белгилаш. Жиноят-процессуал кодексига киритиладиган қўшимчаларга кўра, вояга етмаганлар гувоҳ ёки жабрланувчи сифатида сўроқ қилинганда уларнинг бир кунлик сўроқ муддати чегараланади ҳамда уларнинг қонуний вакиллари тергов жараёнларида иштирок этиши таъминланади. Бу чоралар болаларнинг руҳий саломатлигига ортиқча босим тушишини олдини олишга қаратилган.
Муҳокама жараёнида масъул қўмита томонидан қонун лойиҳасига тайёргарлик босқичида бир қатор ишлар амалга оширилгани таъкидланди. Жумладан, сиёсий партиялар фракциялари, ишчи гуруҳ аъзолари, ҳуқуқшунослар, олимлар ва болалар ҳуқуқи бўйича омбудсман иштирокида йиғилишлар ва семинарлар ташкил этилган.
Мазкур қонун лойиҳаси аввалроқ, 2024 йил 29 апрелда Қонунчилик палатасида муҳокама қилинган эди. Ўшанда депутатлар таклиф ва эътирозлари инобатга олиниб, лойиҳа қайта ишлаш учун қайтарилган. Хусусан, Жиноят кодексининг айрим моддаларига киритилган ўзгаришлар чиқариб ташланган ва «Бола ҳуқуқларига кафолатлар тўғрисида»ги қонунга электрон реестр юритиш бўйича қўшимчалар киритилмаган.
Янги таҳрирда қонун матни ҳуқуқий техник талабларга мувофиқ равишда ишлаб чиқилди ва ташаббускорлар позициясига уйғун ҳолда тақдим этилди.
Эслатиб ўтамиз, 2025 йил январ–август ойларида 2872 нафар бола турли жиноятлардан жабр кўрганлиги ҳақида хабар берган эдик. Улардан 1225 нафари, яъни 42,7 фоизи 12 ёшгача бўлган болалардир.