АҚШ президенти Доналд Трамп биринчи марта Россияни Украинага қарши урушда расман «агрессор» деб атади. Бу Москвага нисбатан унинг позицияси тобора кескинлашаётганини кўрсатади.
Politico нашрининг ёзишича, Трамп якшанба куни журналистлар олдида чиқиш қилиб, жорий ҳафтада Украина ва Россия томонидан жами 8000 нафар аскар ҳалок бўлганини маълум қилган.
«Россияда йўқотишлар кўпроқ. Аммо сен агрессор бўлсанг — йўқотишларинг ҳам кўпроқ бўлиши табиий», — деган Трамп.
Бу баёнот шу билан аҳамиятлики, Трамп аввалги чиқишларида Россияни қоралашдан эҳтиёт қилиб келган эди. 2024 йил феврал ойида АҚШ расман Россия ва Шимолий Корея томонини олган ва БМТнинг Украина ҳудудий яхлитлигини қўллаб-қувватлаш ҳамда Россияни қоралаш ҳақидаги резолюциясини рад этганди. Шунингдек, АҚШ G7 гуруҳи томонидан Россияни агрессор деб аташ таклифига ҳам қарши чиққан.
Апрел ойида эса Трамп урушда Украинани айблаб, «20 баравар кучлироқ душман билан уруш бошлаш ва кейин одамлардан ракета сўраш — ақлли одамнинг иши эмас» деган эди.
Бироқ ёз ойларидан бери Трампнинг Кремлга бўлган муносабати ўзгарди. Унинг маъмурияти Владимир Путинни Украина президенти Володимир Зеленский билан тўғридан тўғри музокара столига ўтказишга уринмоқда, лекин Кремл бу саъй-ҳаракатларни жавобсиз қолдирмоқда.
«Мен еттита урушни тўхтатганман. Бу уруш мен учун осон кечади, деб ўйлагандим. Лекин бу ўта мураккаб бўлиб чиқди. Зеленский ва Путин бир-бирларини жуда ёмон кўришади», — деди Трамп.
Унинг таъкидлашича, Путин билан музокаралар ўтказиш ҳаракатлари самара бермаётгани боис, АҚШ маъмурияти ичида Россияга қарши янги санкциялар жорий этиш талаби ортиб бормоқда. Трамп буни амалга ошириш нияти борлигини айтди, аммо шунда ҳам бажариб бўлмас шартни илгари сурди: аввал НАТО давлатлари Россия нефтидан воз кечиши ва ўз санкция сиёсатини кучайтириши кераклигини таъкидлади.
«Европаликлар — дўстларимиз. Лекин улар ҳали ҳам Россия нефтини харид қилмоқда. Мен уларнинг шундай қилишини истамайман. Қўйилаётган санкциялар етарлича қатъий эмас», — деди у.
Маълумотларга кўра, Европа Иттифоқида Россия энергиясига энг катта талаб Венгрия ва Словакия томонидан сақланмоқда. Улар ЕИнинг импортни босқичма-босқич тўхтатиш режасига қарши чиқмоқда.