Украина президенти Володимир Зеленский Sky Newsга берган эксклюзив интервьюсида АҚШ президенти Доналд Трампдан Владимир Путинни тўхтатиш учун қатъий чоралар кўришни талаб қилди. Унинг сўзларига кўра, Москвага нисбатан босим етарли даражада кучайтирилмаётгани Россияга урушни давом эттириш имконини бермоқда.
Зеленский Ғарб давлатлари Кремлга нисбатан жиддий санкциялар жорий этмаётганидан норозилик билдирди. Унинг фикрича, Путин Аляскада ўтган АҚШ—Россия саммити орқали изоляциядан чиқиб олди ва ҳеч қандай йуқотиш кўрмади.
«У АҚШни алдашни истаяпти. Санкциялардан қочиш ва Трампдан босим кўрмаслик учун ҳамма нарса қилмоқда», — деди Зеленский. У Путиннинг ягона тушунадиган «тили» бу — куч ишлатиш эканини таъкидлади.
Зеленскийнинг сўзларига кўра, Трамп Путинга босим ўтказишда сусткашлик қилмоқда, чунки у бу орқали урушни тўхтатиш йўлини топамиз деб ўйлаяпти. Бироқ Украина раҳбари бундай ёндашув нотўғрилигини айтди. «Путин кучнигина тушунади. Бу унинг она тили каби», — деди у.
У шунингдек, АҚШ Европа Иттифоқи давлатларига боғлиқ бўлмасдан мустақил равишда Россияга қарши кучли санкциялар жорий этиши мумкинлигини қайд этди. «АҚШ етарлича қудратли. Улар буни тезроқ амалга ошириши мумкин. Ҳозир эса етишмаётган ягона нарса — кучли санкциялар пакети», — деди Зеленский.