TBC Uzbekistan Тошкентда илк бор TBC Talks. AI Edition тадбирини ташкил қилди. 11 сентябр куни ўтган тадбирда давлат, хусусий сектор ва технологик ҳамжамиятнинг сунъий интеллект (AI) соҳасидаги шериклиги, стратегиялар ва амалиётлари муҳокама қилинди. Компания мамлакатдаги сунъий интеллект бўйича давлат сиёсатини қўллаб-қувватлашини эълон қилди.
Рақамли технологиялар вазирининг биринчи ўринбосари Олег Пекоснинг маълум қилишича, 2030 йилгача мўлжалланган миллий AI стратегияси доирасида GPU-кластерлар ишга туширилган, маҳаллий катта тил моделлари (LLM) яратиш режалаштирилмоқда. Ушбу инфратузилма давлат-хусусий шериклик асосида ривожлантирилмоқда.
TBC Uzbekistan бош директори Ника Курдиани компаниянинг AI соҳасидаги мақсадини шундай изоҳлади: «Бу биз учун шунчаки тежамкорлик эмас. Мақсад — мижозлар ҳаётини енгиллаштириш ва хизмат сифатини ошириш». TBC аллақачон ўзбек тилидаги виртуал агентлар, овозни таниш ва яратиш, шунингдек, иккита тилда ишловчи LLM яратганини маълум қилди.
Тадбирда Visa, Alif Holding, Uzinfocom, TASS Vision ва АICA, Fintex каби ташкилотлар вакиллари қатнашди. Спикерлар орасида Евгений Лисняк (Visa), Отабек Носиров (Fintex) ва Беҳзод Исмоилов (AICA) каби мутахассислар бўлди. Тадбирда 300 киши шахсан, 650 киши эса онлайн иштирок этди.
TBC Talks. AI Edition юқори даражадаги қизиқиш билан ўтди ва мамлакатдаги AI инфратузилмасининг ўсиши, технологияларга бўлган талаб ва хусусий секторнинг ушбу жараёндаги фаоллигини намоён этди.