2024 йилда Россия ҳукумати томонидан YouTube’га кириш чекланганидан сўнг, мамлакатдаги телекўрсатувлар аудиториясида кескин пасайиш тўхтади. Mediascope маълумотларига кўра, 2020 йилдан бери илк бор умумий телетомошабинлар улуши ўсди — 2023 йилнинг ёзида бу кўрсаткич 60,2 фоиз бўлса, жорий йилнинг июн–август ойларида 59 фоизни ташкил қилди. Бу, айниқса, фақат пасайиш қайд этилаётган беш йил ичида катта бурилиш ҳисобланади.
Масалан, 2020 йили телевизор кўрувчилар улуши 63,3 фоизни ташкил этган, кейинги йиллар давомида эса муттасил камайиб борган. Хусусан, рейтинг ҳам илк бор 12 фоиз даражасида сақланди — бу ўтган йил билан бир хил.
YouTube дастлаб шахсий компютерларда секинлаштирилган, кейинроқ эса бутунлай блокланган. Расмийлар буни аввал серверлардаги муаммо, сўнгра — «қонунбузарлик ва давлатга ҳурматсизлик» сифатида изоҳлаган. Google эса бундай техник муаммоларни рад этган.
Томошабинларнинг телеканалларга қайтиши билан бирга, «Первий канал» каби марказий каналлар аудиториясини йўқотишда давом этмоқда. Mediascope’га кўра, НТВ ўз томошабинларининг 13 фоизини йўқотган, «Первий канал» эса илк бор кунлик аудитория бўйича 5-ўринга тушиб кетган. Россия–Украина уруши бошланганидан бери «Первий» қарийб 25 фоиз аудиториясини йўқотган.